Maliyyə

Ana səhifə

Maliyyə

Azərbaycanda manatın real effektiv məzənnəsi artır

17 aprel 2009 11:05 (UTC +04:00)

Bakı. Vahab Rzayev – APA-Economics. Azərbaycanda manatın nominal effektiv məzənnəsi 2009-cu ilin yanvar-fevral aylarında 8,1% artıb. Azərbaycan Milli Bankından «APA-Economics»ə verilən məlumata əsasən, yanvar-fevralda qeyri-neft sektoru üzrə nominal effektiv məzənnə 31,3% yüksəlib.
Qeyd edək ki, ölkənin qeyri-neft sektoru üzrə rəqabət qabiliyyətini qiymətləndirmək üçün nominal və real məzənnə indekslərinin (neft sektoru çıxılmaqla) hesablanmasında ticarət dövriyyəsi, idxal və ixrac göstəriciləri istifadə edilir. Ticarət tərəfdaşı olan ölkələrin valyutalarına nəzərən ikitərəfli real məzənnələrinin dəyişməsinin ticarət xüsusi çəkiləri nəzərə alınmaqla manatın real effektiv məzənnəsi isə (neft sektoru daxil olmaqla) yanvar-fevral ayında 28,6% bahalaşıb. Qeyri-neft sektoru üzrə real effektiv məzənnə cari ilin ilk iki ayında 23,7% möhkəmlənib.
Xatırladaq ki, real effektiv məzənnə ölkənin əsas xarici ticarət tərəfdaşlarının valyutalarının real mübadilə məzənnələrinin orta ölçülmüş göstəricisidir və onun hesablanmasında müvafiq ölkələrin Azərbaycanın xarici ticarət dövriyyəsindəki payı nəzərə alınır.
Real effektiv məzənnənin artımı ölkənin yerli mallarının rəqabətlilik qabiliyyətinin düşdüyünü göstərir. Eyni zamanda, real effektiv məzənnənin hesablanmasında ölkədə və xarici ticarətdə tərəfdaş ölkələrdəki illik inflyasiya nəzərə alınır, yəni real effektiv məzənnənin artımına həm də yüksək inflyasiya təsir edir. Hətta tək Azərbaycanda deyil, tərəfdaş ölkələrdə də inflyasiyanın səviyyəsi nəzərə alınıır. Azərbaycanda olan inflyasiyanın tərəfdaş dövlətlərdəki inflyasiyadan artıq olması yerli iqtisadiyyatın rəqabətlilik qabiliyyətinin düşdüyünü əks etdirir.
Qeyd edək ki, 2008-ci ilin yekünlarına görə, manatın real effektiv məzənnəsi 14,1% artıb ki, bu da Azərbaycan Milli Bankının apardığı hesablamalara əsasən, inflyasiyanın idxalı nəticəsində baş verib. Göründüyü kimi, cari ildə real effektiv məzənnə daha kəskin sürətlə artır.