Maliyyə

Ana səhifə

Maliyyə

«Bank Respublika» bütün ofislərində müştəri xidmətlərinin vaxtını uzadıb

20 aprel 2009 10:09 (UTC +04:00)

Bakı. Elnur Hüseynquluyev – APA-Economics. Azərbaycanın «Bank Respublika» Səhmdar Kommersiya Bankı (SKB) Bakıda və bütün regionlarda fəaliyyət göstərən filial və şöbələrində müştərilərə göstərilən xidmətlərin vaxtını saat 17:45-dək artırıb.
Bankın baş ofisindən «APA-Economics»ə verilən məlumata görə, müştəri xidmətləri qrafikinə uyğun olaraq, bankın filial və şöbələri müştərilərə həftənin beş günü saat 9:00-dan 17:45-dək, şənbə günü isə saat 10:00-dan 15:00-dək xidmət göstərəcək.
Bununla yanaşı, Bakıda bankın «Neftçilər» filialı həftənin 5 günü saat 21:00-dək, şənbə günü isə saat 19:00-dək, eləcə də «Ofis24» həftənin bütün günləri 24 saat fasiləsiz xidmət göstərir.
Qeyd edək ki, bankın bütün filial və şöbələrində müştəri xidmətinin vaxtı əvvəllər saat 17:00-dək olub.
Xatırladaq ki, 1992-ci ildə yaradılan «Bank Respublika»nın hazırda Bakı və regionlarda 32 filial və şöbəsi fəaliyyət göstərir. Almaniyanın DEG İnvestisiya Şirkəti və «Sparkassen International Development Trust» şirkəti 2005-ci ilin aprel ayında bankın nizamnamə kapitalında «25%+1 səhm» iştirak payı alıb.
Cari ilin yanvar ayının 1-nə bankın aktivlərinin həcmi 387,875 mln. manat, kredit portfeli 260,367 mln. manat, depozit portfeli 135,816 mln. manat, məcmu kapitalı 43,299 mln. manat, o cümlədən nizamnamə kapitalı 22,580 mln. manat təşkil edib.