Maliyyə

Ana səhifə

Maliyyə

Qlobal Risk Peşəkarları Assosiasiyasının icraçı direktoru Azərbaycana gələcək

18 sentyabr 2009 13:57 (UTC +04:00)

Bakı. Nicat Mustafayev – APA-Economics. Bu ilin sentyabr ayının 21-də Qlobal Risk Peşəkarları Assosiasiyasının (GARP) icraçı direktoru Kristofer Donouenin rəhbərlik etdiyi nümayəndə heyəti Azərbaycana gələcək.

Azərbaycan Risk Peşəkarları Assosiasiyasından (ARPA) «APA-Economics»ə verilən məlumata görə, səfərin məqsəd GARP-ın şəbəkəsinin Azərbaycan nümayəndəliyinin ilk iclasında və yerli risk menecerləri üçün sentyabrın 25-də keçirilən kursun yekununda iştirak etməkdir. Tədbirdə K.Donouen məruzə ilə çıxış edəcək.

Bundan başqa, 4 günlük səfər çərçivəsində K.Donouenin Azərbaycan Maliyyə Nazirliyi, Mərkəzi Bank, Beynəlxalq Bank, Azərbaycan İnvestisiya Şirkəti, «Azərenerji» ASC kimi təşkilat və şirkətlərin rəsmi nümayəndələri ilə görüşləri nəzərdə tutulub.

Qeyd edək ki, Mərkəzi Bankın təşəbbüsü ilə ARPA Qlobal Risk Peşəkarları Assosiasiyası ilə birgə Bakıda risk menecerləri üçün «Bank riskinin və tənzimlənməsinin əsasları» mövzusunda keçirdiyi sertifikatlaşdırma proqramı sentyabrın 25-də başa çatır. İyul ayının 14-dən başlamış tədris kursunun keçirilməsində məqsəd iştirakçıların bank riskləri sahəsində baza biliklərinin formalaşmasına nail olmaqdır. GARP-nin yüksək ixtisaslı mütəxəssislərinin apardığı kursda 100 nəfər iştirak edib.

Xatırladaq ki, ARPA 2009-cu ilin may ayından fəaliyyət göstərir. Assosiasiyasının əsas məqsədi iqtisadiyyatın müxtəlif sahələrində riskin idarə edilməsi mədəniyyətini formalaşdırmaqla Azərbaycanın stabil iqtisadi inkişafına kömək olmaqdır.