Maliyyə

Ana səhifə

Maliyyə

Azərbaycan Dövlət Neft Fondunun 2009-cu il büdcəsinə dəyişikliklər edilib

08 oktyabr 2009 08:22 (UTC +04:00)

Bakı. Vahab Rzayev – APA-Economics. Azərbaycan prezidenti İlham Əliyev Dövlət Neft Fondunun (ARDNF) vəsaiti hesabına həyata keçirilən qaçqın və məcburi köçkünlərin sosial-məişət və məskunlaşma məsələləri ilə bağlı bəzi tədbirlərin, Oğuz-Qəbələ zonasından Bakı şəhərinə su kəmərinin çəkilməsi və Samur-Abşeron suvarma sisteminin yenidən qurulması ilə bağlı layihələrin vaxtında icrasını təmin etmək məqsədi ilə ARDNF-in 2009-cu il büdcəsinə dəyişikliklər edilməsi barədə fərman imzalayıb.

Azərbaycan prezidentin mətbuat xidmətindən «APA-Economics»ə verilən məlumata görə, fərmana əsasən, qaçqınların və məcburi köçkünlərin sosial məişət və məskunlaşma məsələləri ilə bağlı bəzi tədbirlərin maliyyələşdirilməsinə ayrılan vəsaitlərin həcmi 80 mln. manatdan 90 mln. manatadək, Oğuz-Qəbələ zonasından Bakı şəhərinə su kəmərinin çəkilməsi layihəsinin maliyyələşdirilməsinə ayrılan vəsaitlərin həcmi 100 mln. manatdan 120 mln. manatadək, Samur-Abşeron suvarma sisteminin yenidən qurulması layihəsinin maliyyələşdirilməsinə ayrılan vəsaitlərin həcmi 110 mln. manatdan 130 mln. manatadək artırılıb. Eyni zamanda, Bakı-Tiflis-Qars yeni dəmir yolu layihəsinin maliyyələşdirilməsinə ayrılan vəsaitlərin həcmi 80 mln. manatdan 30 mln. manatadək azaldılıb.