Maliyyə

Ana səhifə

Maliyyə

Azərbaycan Beynəlxalq Bankının səhm sertifikatlarının yeni forması təsdiq edilib

08 oktyabr 2009 11:38 (UTC +04:00)

Bakı. Elnur Hüseynquluyev – APA-Economics. Azərbaycan Beynəlxalq Bankının (ABB) bütün səhm buraxılışları Qiymətli Kağızlar üzrə Dövlət Komitəsində vahid nömrə altında qeydiyyata alınaraq səhm sertifikatlarının yeni forması təsdiq edilib.

Bankın baş ofisindən «APA-Economics»ə verilən məlumata görə, bankın səhmdarları hazırda əllərində olan sertifikatları və səhmləri ABB-yə qaytarmaqla, sahib olduqları bütün səhmlərə (son buraxılış zamanı alınan səhmlər daxil olmaqla) yeni sertifikatı ala bilərlər.

Xatırladırıq ki, sertifikat səhmlərə mülkiyyət hüququnu təsdiq edən yeganə sənəddir və pulsuz verilir. Sertifikatların dəyişdirilməsi üçün sərbəst formada yazılan ərizə, sürücülük vəsiqəsi və xarici pasport istisna olmaqla səhmdarın şəxsiyyətini qanunvericiliklə nəzərdə tutulmuş qaydada təsdiq edən sənəd (həqiqi hərbi xidmətdə olan hərbiçilər üçün hərbi bilet), əvvəldən olan sertifikatın və (və ya) səhmlərin əsli, səhmdarın adından müraciət edənlər üçün əlavə olaraq notarial və ona bərabər tutulmuş qaydada təsdiq edilmiş etibarnamənin əsli ilə bağlı sənədlər təqdim edilməlidir.

Qeyd edək ki, Azərbaycan və regionun ən iri bank kredit təşkilatı olan ABB 1992-ci ildən fəaliyyət göstərir. Bankın nizamnamə kapitalında dövlətin iştirak payı 50,2% təşkil edir. Səhmlərin qalan 40%-i xüsusi mülkiyyətdədir, 10%-i isə bankın əmək kollektivinə məxsusdur. Hazırda bankın respublika üzrə 37 filialı fəaliyyət göstərir.