Maliyyə

Ana səhifə

Maliyyə

Beynəlxalq Valyuta Fondu: Bu il Azərbaycanın dövlət büdcəsində kəsir gözlənilmir

08 oktyabr 2009 12:22 (UTC +04:00)

Bakı. Nicat Mustafayev – APA-Economics. Beynəlxalq Valyuta Fondu (BVF) 2009-cu ilin sonunda Azərbaycanın dövlət büdcəsində kəsirin olmayacağını proqnozlaşdırır. «APA-Economics»in məlumatına görə, bunu BVF-nin Azərbaycandakı daimi nümayəndəsi Koba Qvenetadze bildirib.

BVF rəsmisinin sözlərinə görə, 2009-cu ildə Azərbaycanın fiskal balansında kəsirin olmayacağı proqnozlaşdırılır: «Dünyada neftin qiymətinin artması nəticəsində Azərbaycan büdcəsi üçün belə bir təhlükə gözlənilmir».

K.Qvenetadze onu da bildirib ki, gələn il neftin bir barelinin orta qiymətini 62 ABŞ dolları olacağı gözlənilir və bu, büdcə kəsirinin olmasının qarşısını alacaq: «Gələn il üçün Azərbaycan hökumətindən büdcə proqnozlarını alandan sonra BVF-nin növbəti hesabatında büdcə rəqəmləri öz əksini tapacaq və istisna olunmur ki, proqnozlarımız dəyişə bilər».

Xatırladaq ki, ötən il Azərbaycanın dövlət büdcəsinin gəlirləri 10,763 mlrd. manat, xərcləri isə 10,774 mlrd. manat təşkil edib. Nəticədə 11 mln. manatlıq büdcə defisit yaranıb.