Maliyyə

Ana səhifə

Maliyyə

«Azərbaycan Sənaye Bankı» müştərilərə üç yeni əmanət növünü təqdim edib

09 oktyabr 2009 14:15 (UTC +04:00)

Bakı. Elnur Hüseynquluyev – APA-Economics. «Azərbaycan Sənaye Bankı» (ASB) ASC müştərilərə «BankHome», «BankWork» və «BankLife» adlı yeni əmanət növlərini təqdim edib.

ASB-dən «APA-Economics»ə verilən məlumata görə, yeni əmanət məhsulları, əmanətin məbləğinə görə seqmentlərə ayrılır və hər seqmentin öz ehtiyac və istəklərinə görə üstünlüyü var.

«BankHome» əmanəti, kiçik məbləğləri toplayıb kapitala çevirmək imkanı verir. Bu xüsusiyyətinə görə «BankHome» əmanəti, müəyyən məbləğdə kapitalı yığmaq istəyən, peşə sahibi, sahibkar və ya əlavə gəliri olan, kiçik və orta gəlirli müştərilər üçün nəzərdə tutulub. «BankHome» əmanəti ilə vəsaitlər 1-36 ay müddətinə yerləşdirilə bilər. Əmanətin minimum məbləği 500 manat (dollar, avro) təşkil edir.

«BankWork» əmanəti müxtəlif üstünlüklər verməklə yanaşı, kapitalı artırmağa imkan verir. Bu xüsusiyyətinə görə «BankWork» əmanəti, əsasən, mövcud kapitalın təhlükəsizliyinə və adekvatlığına xüsusi diqqət verən peşə sahibi, sahibkar və ya əlavə gəliri olan, orta və yüksək gəlirli müştərilər üçün nəzərdə tutulub. Bu əmanət üzrə vəsaitlər 1-36 aya yerləşdirilə bilər. Əmanətin minimum məbləği 10 001 manat (dollar, avro) təşkil edir.

«BankLife» əmanəti isə qiymətli üstünlüklərdən istifadə imkanı verməklə yanaşı, iri məbləğli kapitalı daha da artırır. Bu xüsusiyyətinə görə «BankLife» əmanəti əsasən, mövcud kapitalın təhlükəsizliyini və adekvatlığına xüsusi diqqət verən, fərqli olmağı həyat prinsipi olaraq seçmiş, VİP müştərilər üçün nəzərdə tutulub. Bu əmanət üzrə vəsaitlər 1-36 aya yerləşdirilə bilər və əmanətin minimum məbləği 50 001 manat (dollar, avro) təşkil edir.

Yerləşdirilmiş əmanət üçün faiz dərəcələri, yerləşdirmə müddətinə, valyuta növünə, faizlərin alınması şərtlərinə müvafiq olaraq dəyişməklə bərabər, illik 16,5%-dək yüksəlir.

Kampaniya daxilində vəsait yerləşdirən müştərilər əmanətin məbləğini artırmaq və faiz itirmədən azaltmaq, istehlak krediti və kredit kart məhsullarından daha üstün şərtlərlə istifadə etmək, «Azərbaycan Sənaye Sığorta», «ASIR Travel», «Excelsior Hotel», «Excelsior Aura Wellness Center» və «Hotel Express International» kimi nüfuzlu təşkilatlardan güzəşt və imtiyazlar, əmanətin növünə görə fərqlilik göstərən hədiyyə və üstünlüklər əldə edə bilər.
Xatırladaq ki, «Azərbaycan Sənaye Bankı» 1996-cı ildə «CI Bank» kimi fəaliyyətə başlayıb və 2006-cı ilin sonunda brendini dəyişib. Cari ilin oktyabr ayının 1-nə bankın aktivlərinin həcmi 107,664 mln. manat, depozit portfeli 72,639 mln. manat, kredit portfeli 64,27 mln. manat, istehlak kreditlərinin həcmi 26,492 mln. manat, məcmu kapitalı 23,591 mln. manat, o cümlədən nizamnamə kapitalı 20 mln. manat təşkil edir. Bankın respublika üzrə 9 filialı, 23 bankomatı və 255 POS-terminalı mövcuddur.