Maliyyə

Ana səhifə

Maliyyə

Dünya Bankı Azərbaycanda maliyyə sektorunda istehlakçıların müdafiəsi ilə bağlı Fəaliyyət Planı hazırlayır

12 oktyabr 2009 07:10 (UTC +04:00)

Bakı. Nicat Mustafayev – APA-Economics. Azərbaycanda səfərdə olan Dünya Bankının (DB) maliyyə sektorunda istehlakçıların müdafiəsi üzrə məsləhətçisi Şon Mondinin rəhbərlik etdiyi nümayəndə heyəti Qiymətli Kağızlar üzrə Dövlət Komitəsində (QKDK) görüş keçirib.

QKDK-dan «APA-Economics»ə verilən məlumata görə, görüşün əsas məqsədi DB-nın müvafiq layihəsi çərçivəsində beynəlxalq ekspertlər tərəfindən hazırlanmış Azərbaycanın maliyyə sektorunda istehlakçıların müdafiəsi və onların maliyyə savadlılıq səviyyəsinin mövcud vəziyyətinə dair hesabatın müzakirə edilməsi və hesabat çərçivəsində təklif edilən tövsiyələr əsasında birgə əməkdaşlıq imkanlarının müəyyən edilməsindən ibarət olub.

Görüşdə Azərbaycanda qiymətli kağızlar bazarı da daxil olmaqla, ümumilikdə maliyyə sektoru üzrə istehlakçıların müdafiəsinə dair mövcud vəziyyət, eləcə də missiyanın bu sahədə həyata keçirilməsi tövsiyə olunan qısa və ortamüddətli Fəaliyyət Planı müzakirə olunub.

Görüşün nəticəsi olaraq, QKDK-nın Bankın missiyası tərəfindən təqdim edilən Fəaliyyət Planının layihəsinə dair təklifləri missiyanın üzvlərinə təqdim edilib və sözügedən Fəaliyyət Planının QKDK-nın Məlumatlandırma və Maarifləndirmə Konsepsiyası çərçivəsində həyata keçirilməsi nəzərdə tutulan tədbirlərlə uzlaşdırılması məqsədəuyğun hesab edilib. Görüşdə maliyyə sektorunda istehlakçıların müdafiəsi və maarifləndirilməsi istiqamətində müvafiq mərkəzi icra orqanları ilə səylərin səmərəli əlaqələndirilmiş formada həyata keçirilməsinin zəruriliyi xüsusi olaraq vurğulanıb.