Maliyyə

Ana səhifə

Maliyyə

«Unibank»ın mənfəəti son bir ildə kəskin azalıb

12 oktyabr 2009 13:56 (UTC +04:00)

Bakı. Elnur Hüseynquluyev – APA-Economics. Azərbaycanın «Unibank» Səhmdar Kommersiya Bankının (SKB) aktivlərinin həcmi 2009-cu ilin oktyabr ayının 1-nə 345,042 mln. manat təşkil edib ki, bu da ötən ilin analoji dövrü ilə müqayisədə 26,2% azdır.

Bankın baş ofisindən «APA-Economics»ə verilən məlumata görə, hesabat dövründə bankın depozit portfeli 12% azalaraq 98,526 mln. manat, kredit portfeli 31% azalaraq 239,709 mln. manat, o cümlədən istehlak kreditlərinin həcmi 33,7% azalaraq 99,062 mln. manat olub. Bu müddət ərzində bankın məcmu kapitalı 17,3% artaraq 75,207 mln. manat, o cümlədən nizamnamə kapitalı 55,4% artaraq 42,076 mln. manat təşkil edib.

Qeyd edək ki, ötən ilin müvafiq dövrü ilə müqayisədə bankın gəlirləri 30,8% azalaraq 41,382 mln. manata, xərcləri isə 25,8% azalaraq 38,569 mln. manata çatıb. Nəticədə, bankın mənfəəti son bir il ərzində 2,8 dəfə azalaraq 2,813 mln. manat, xalis mənfəəti isə 2,7 dəfə azalaraq 1,194 mln. manat olub.

Xatırladaq ki, bu müddətdə bank tərəfindən əlavə 2 filial açılıb, həmçinin 6 bankomat quraşdırılıb. Eyni zamanda, bankın işçilərinin sayı 3,4% azalaraq 537 nəfər, orta aylıq əmək haqqı isə 10% artaraq 1 090 manat təşkil edib.

Təsisçisi Avropa Yenidənqurma və İnkişaf Bankı (15,15%), Almaniyanın DEG İnvestisiya Korporasiyası (8,33%), hüquqi (0,9%) və fiziki şəxslər (75,62%) olan «Unibank» SKB 1992-ci ildən fəaliyyət göstərir. Hazırda bankın respublika üzrə 24 filialı, 62 bankomatı və 228 POS-termnalı var.