Maliyyə

Ana səhifə

Maliyyə

“Azərpoçt” beynəlxalq pul köçürmələrinin həyata keçirilməsi ilə bağlı danışıqlar aparır

13 oktyabr 2009 15:20 (UTC +04:00)

Bakı. Aynur Vəliyeva - APA-Economics. “Azərpoçt” MMC-i Birləşmiş Ərəb Əmirliklərinin poçt administrasiyası ilə MTF/STEFI sistemi vasitəsilə beynəlxalq pul köçürmələrinin həyata keçirilməsi ilə bağlı danışıqlar aparır.

Rabitə və İnformasiya Texnologiyaları Nazirliyinin poçt sektorunun müdiri Novruz Məmmədovun “APA-Economics”ə verdiyi məlumata görə, yaxın gələcəkdə Berndə keçiriləcək Ümumdünya Poçt İttifaqının (ÜPİ) sessiyasında Azərbaycan və BƏƏ-nin poçt administrasiyalarının rəhbərləri arasında bununla bağlı danışıqlar aparılacaq. Eyni zamanda Özbəkistan və Tacikistanla da bu istiqamətdə danışıqlar aparılır. Hazırda texniki nöqteyi-nəzərdən tam hazır olmadıqları üçün bu ölkələrin pul köçürmələri sisteminə qoşulması mümkün deyil.

Bununla yanaşı, uzun müddət Estoniya ilə aparılan danışıqlar nəticəsiz qalıb. Bunun səbəbi isə bu ölkənin digər Avropa ölkələri kimi “Eurogiro” beynəlxalq elektron pul köçürmələri sisteminə qoşulub. Dünyanın 40 ölkəsi “Eurogiro” sisteminin üzvüdür və bu sistyem vasitəsi ilə elektron pul köçürmələrini həyata keçirir. Bu sistem MTF/STEFI ilə müqayisədə baha başa gəldiyindən və Azərbaycanın pul köçürmələri sahəsində ən çox pul dövriyyəsi (80%) MDB ölkələri, o cümlədən Rusiya, Ukrayna, Belorus, Qazaxıstanın payına düşdüyündən, Azərbaycanın ona qoşulması sərfəli deyil. Hazırda ÜPİ-ı “Eurogiro” və MTF/STEFI beynəlxalq elektron pul köçürmələri sistemlərinin bir-birinə inteqrasiya ətrafında danışıqlar aparır.

“Azərpoçt” MMC yaxın gələcəkdə MTF/STEFI beynəlxalq sisteminin təcili poçt elektron pul köçürmələri xidmətlərinə qoşulmaq niyyətindədir. N.Məmmədovun sözlərinə görə, bu xidmət vasitəsilə bir saat ərzində pul köçürmələrinin ünvanlandırılan şəxsə çatdırılması mümkündür. “Azərpoçt”un hazırda istifadə etdiyi MTF/STEFI proqramı vasitəsilə adi pul köçürmələri ən tez halda üç günə ünvanlandırılan şəxsə çatdırılır.

Xatırladaq ki, Azərbaycan MTF/STEFI beynəlxalq pul köçürmələri sisteminə 2004-cü ildən qoşulub. Hazırda sistem vasitəsilə Rusiya, Moldova, Belarus, Ukrayna, Qazaxıstan, Birləşmiş Ərəb Əmirlikləri ilə pul köçürmələri həyata keçirilir.

Qeyd edək ki, STEFI ÜPİ-nin pul köçürmələri sisteminə dünyanın 22-dən çox dövlətinin poçt təşkilatı qoşulub. ÜPİ-nin hesablamalarına görə, dünya üzrə 48 ölkə arasında bu sistem vasitəsilə pul köçürmələrinin mübadiləsi həyata keçirilir.