Maliyyə

Ana səhifə

Maliyyə

Azərbaycan Beynəlxalq Bankı özünün ipoteka proqramının icrasına hazırlaşır

14 oktyabr 2009 13:45 (UTC +04:00)

Bakı. Elnur Hüseynquluyev – APA-Economics. Azərbaycan Beynəlxalq Bankı (ABB) 2010-cu ilin may ayından etibarən özünün ipoteka proqramının icrasına başlamaq niyyətindədir. Bankın İdarə Heyətinin sədri Cahangir Hacıyevin «APA-Economics»ə verdiyi məlumata görə, proqramın həyata keçirilməsi məqsədi ilə ABŞ-ın OPIC Korporasiyasından (Özəl Sektora Dəstək Dövlət Korporasiyası) vəsaitin cəlb edilməsi planlaşdırılır.

C.Hacıyev bildirib ki, ipoteka kreditləşməsi mürəkkəb proses olduğuna görə, 120 mln. manat həcmində cəlb edilməsi planlaşdırılan kreditlə bağlı danışıqlar prosesi 6 ay davam edə bilər. «Qeyd etmək istəyirəm ki, 11-25 il müddətinə nəzərdə tutulmuş kreditlərin faiz dərəcəsi Azərbaycan İpoteka Fondunun tətbiq etdiyi faiz dərəcəsindən yuxarı olmayacaq».

Xatırladaq ki, Azərbaycan və regionun ən iri bank kredit təşkilatı olan ABB 1992-ci ildən fəaliyyət göstərir. Bankın nizamnamə kapitalında dövlətin iştirak payı 50,2% təşkil edir. Səhmlərin qalan 40%-i xüsusi mülkiyyətdədir, 10%-i isə bankın əmək kollektivinə məxsusdur. Hazırda bankın respublika üzrə 37 filialı fəaliyyət göstərir.

Qeyd edək ki, əsasən dövlət büdcəsindən maliyyələşən Azərbaycan İpoteka Fondunun vəsaitləri ipoteka krediti alan vətəndaşlara maksimum illik 8%-lə ayrılır, uçot dərəcəsi isə illik 2% təşkil edir.