Maliyyə

Ana səhifə

Maliyyə

«Royal Bank» son bir ildə depozit portfelini 59% genişləndirib

16 oktyabr 2009 07:14 (UTC +04:00)

Bakı. Elnur Hüseynquluyev – APA-Economics. «Royal Bank» Açıq Səhmdar Cəmiyyətinin (ASC) aktivlərinin həcmi 2009-cu ilin oktyabr ayının 1-nə 135,55 mln. manat təşkil edib ki, bu da ötən ilin oktyabrın 1-nə olan analoji göstərici ilə müqayisədə 35% çoxdur.

Bankın baş ofisindən «APA-Economics»ə verilən məlumata görə, hesabat dövründə bankın depozit portfeli 58,5% genişlənərək 54,501 mln. manata, kredit portfeli 28,6% artaraq 99,254 mln. manata, o cümlədən istehlak kreditlərinin həcmi 33,3% artaraq 85,747 mln. manata çatıb. Həmçinin, bankın məcmu kapitalı 11,8% artaraq 21,698 mln. manat, o cümlədən nizamnamə kapitalı 17,7% artaraq 19,912 mln. manat təşkil edib.

Qeyd edək ki, son bir il ərzində bankın gəlirləri 61% artaraq 18,947 mln. manat, xərcləri isə 77% artaraq 17,981 mln. manat olub. Nəticədə, son bir il ərzində bankın mənfəəti 60% azalaraq 647 min manata çatıb.

Xatırladaq ki, bu müddət ərzində bank əlavə 3 filial açıb, 8 bankomat və 26 POS-terminal quraşdırıb. Eyni zamanda, bankın işçilərinin sayı 26% artaraq 582 nəfər, orta aylıq əmək haqqı isə 6,4% azalaraq 510 manat olub.

Əsas təsisçisi ABŞ vətəndaşı olan «Royal Bank» SKB 1993-cü ildə Azərbaycanda «OZ Bank» kimi yaradılıb. Hazırda bankın respublika üzrə 31 filialı, 4 mübadilə məntəqəsi, 29 bankomatı və 97 POS-terminalı fəaliyyət göstərir.