Maliyyə

Ana səhifə

Maliyyə

«United Credit Bank» fiziki şəxslər üzrə müddətli depozitləri son bir ildə 41% artırıb

16 oktyabr 2009 12:14 (UTC +04:00)

Bakı. Elnur Hüseynquluyev – APA-Economics. Azərbaycanın «United Credit Bank» Açıq Səhmdar Cəmiyyətinin (ASC) aktivlərinin həcmi 2009-cu ilin oktyabr ayının 1-nə 34,527 mln. manat təşkil edib ki, bu da ötən ilin müvafiq dövrü ilə müqayisədə 3% çoxdur.

Bankın İdarə Heyətinin sədr müavini Vahid Əliyevin «APA-Economics»ə verdiyi məlumata görə, hesabat dövründə bankın depozit portfeli 20,2% genişlənərək 10,428 mln. manata, kredit portfeli 14,1% artaraq 25,301 mln. manata, o cümlədən istehlak kreditlərinin həcmi 8,6% artaraq 9,563 mln. manata çatıb.

Bu müddət ərzində bankın öhdəlikləri 20,1% artaraq 17,018 mln. manat, məcmu kapitalı 13,033 mln. manat, o cümlədən nizamnamə kapitalı 12,108 mln. manat təşkil edib.

Bankın depozit portfelinin strukturunda müddətli depozitlərin həcmi 11,4% artaraq 8,303 mln. manat, o cümlədən fiziki şəxslərin müddətli depozitləri 41,2% genişlənərək 6,623 manat olub.

Qeyd edək ki, son bir il ərzində bankın ümumi gəlirləri 9% artaraq 3,858 mln. manat, o cümlədən faiz gəlirləri 12,8% artaraq 3,481 mln. manat, qeyri-faiz gəlirləri isə 0,377 mln. manat təşkil edib.

Hesabat dövründə bankın ümumi xərcləri 30% artaraq 4,395 mln. manat, faiz xərcləri 1,429 mln. manat, qeyri-faiz xərcləri 2,966 mln. manat olub.

Xatırladaq ki, təsisçisi 1 hüquqi və 2 fiziki yerli şəxs olan «United Credit Bank» 1996-cı ildə «Rossiyskiy Kredit» Rusiya-Azərbaycan Kommersiya Bankı kimi yaradılıb və 1998-ci ildə brendini dəyişib. Hazırda bankın respublika üzrə 5 filialı, 5 bankomatı və 7 POS-terminalı fəaliyyət göstərir.