Maliyyə

Ana səhifə

Maliyyə

CIIC-nin səhmdarları: Azərbaycanın xarici investorlar üçün cəlbediciliyini artırmaq üçün tarif və rüsumlar aşağı salınmalıdır

19 oktyabr 2009 14:02 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan İnvestisiya Şirkəti (AIC) və İslam İnkişaf Korporasiyası (ICD) tərəfindən təsis edilən Xəzər Beynəlxalq İnvestisiya Şirkətinin (CIIC) səhmdarlarının iştirakı ilə mətbuat konfransı keçirilib.

«APA-Economics»in məlumatına görə, tədbirdə çıxış edən ICD-nin icraçı direktoru Xalid əl Əbudi bildirib ki, CIIC-nin yaradılmasının məqsədi Azərbaycanda qeyri-neft sektorunu inkişaf etdirmək, ölkə iqtisadiyyatına investisiya yatırmaq və respublikada icra olunan layihələrin maliyyələşdirilməsində iştirak etməkdir.

Tədbirdə iştirak edən AIC-nin icraçı direktoru Əfqan İsayev Azərbaycanın iqtisadi inkişafından məlumat verib və qeyd edib ki, ölkənin qeyri-neft sektorunun ÜDM-də payı 85%-ə çatıb.

Bundan başqa, tədbirdə CIIC-nin icraçı direktoru Toğrul Köçərli şirkətin məqsədləri, prioritetləri və hazırda iştirak etdiyi layihələrdən məlumat verib və bildirib ki, CIIC 3 mln. manat məbləğində ilkin nizamnamə kapitalı ilə yaradılıb: «Gələcəkdə şirkətin nizamnamə kapitalını 55 mln. manat çatdırmaq niyyətindəyik ki, hazırda bu rəqəm 23 mln. manat təşkil edir. Bunun da 17 mln. manatı xarici investorların payına düşür».

Bundan başqa, tədbirdə CIIC-nin səhmdarları sırasına daxil olan şirkətlərin (Səudiyyə Ərəbistanın «Tanmiyat Group»u, Yəmənin «Al Ahmar Group»u və Küveytin «Aref Investment Group»u) nümayəndələri çıxış edərək CIIC-nin əsasən kənd təsərrüfatı, daşınmaz əmlak, logistika və digər sahələrdə layihələr icra etdiyini bildirib.

Öz növbəsində «Al Ahmar Group»un rəhbəri Həmid əl Əhmar Azərbaycanın bank sisteminin inkişaf etdirilməsinə daha diqqətlə yanaşmağı, həmçinin tarif və rüsumları aşağı salmağı tövsiyə edib ki, Azərbaycan xarici investorlar üçün daha cəlbedici olsun.

Xatırladaq ki, AIC ilə ICD arasında şəriət prinsipləri əsasında fəaliyyət göstərəcək müştərək investisiya şirkətinin yaradılmasına ilə bağlı qərar 2007-ci ilin noyabr ayında AİŞ-in Müşahidə Şurasının iclasında qəbul edilib.