Maliyyə

Ana səhifə

Maliyyə

Yanvar-sentyabr aylarında Azərbaycanda iqtisadi artım 6%-i ötüb

19 oktyabr 2009 14:31 (UTC +04:00)

Bakı. Nicat Mustafayev – APA-Economics. Cari ilin yanvar-sentyabr ayları ərzində Azərbaycanda istehsal olunmuş ümumi daxili məhsul əvvəlki ilin eyni dövrünə nisbətən 6,1% artaraq 23,4 mlrd. manata çatıb. ÜDM-in əhalinin hər nəfərinə düşən həcmi isə 2 657,7 manat və ya 3 305,6 ABŞ dolları təşkil edib.

Dövlət Statistika Komitəsindən «APA-Economics»ə verilən məlumata görə, əlavə dəyərin əksər hissəsi (64,0%) iqtisadiyyatın istehsal sahələrində yaradılıb və onun həcmi 2008-ci ilin eyni dövrü ilə müqayisədə 6,7% çox olub. Xidmət sahələrində istehsal olunmuş əlavə dəyərin həcmi 6,1% artıb, onun ÜDM-də xüsusi çəkisi isə 2008-ci ildəki 19,4%-dən 28,6%-dək yüksəlib. ÜDM-in strukturunda 7,4% paya malik olan məhsula və idxala xalis vergilərin əvvəlki ildəkinə nisbətən artımı müşahidə olunmayıb.

Hesaöat dövründə Azərbaycanın sənaye kompleksində 11,7 mlrd. manatlıq, yaxud ümumi daxili məhsulun 49,9%-i qədər, kənd təsərrüfatı, ovçuluq və meşə təsərrüfatında 1,5 mlrd. manatlıq (6,5%), tikintidə 1,8 mlrd. manatlıq (7,6%), nəqliyyatda 1,5 mlrd. manatlıq (6,3%), poçt və rabitədə 502,0 mln. manatlıq (2,1%), topdan və pərakəndə ticarət, avtomobillərin, məişət məmulatlarının və şəxsi istifadə əşyalarının təmiri üzrə xidmətlərdə 1,7 mlrd. manatlıq (7,1%), mehmanxana və restoran xidmətlərində 266,1 mln. manatlıq (1,1%), sosial və digər xidmət sahələrində 2,8 mlrd. manatlıq (12,0%) əlavə dəyər yaradılıb.

Məhsula və idxala xalis vergilər ÜDM-in 7,4%-ni təşkil edib.