Maliyyə

Ana səhifə

Maliyyə

Fond bazarları böhrandan əvvəlki səviyyəyə çatıb

20 oktyabr 2009 08:24 (UTC +04:00)

Bakı. Vahab Rzayev – APA-Economics. Dünya maliyyə böhranının kəskinləşməsindən bir il sonra beynəlxalq fond bazarları itirdiklərinin əsas hissəsini qaytara bilib. «APA-Economics»in məlumatına əsasən, hazırda dünya fond bazarlarında səhmlərin ümumi dəyəri böhrandan əvvəlki səviyyəyə yaxınlaşmaqdadır. Belə ki, hazırda bazar kapitallaşması 44,8 trln. dollara bərabərdir, ötən ilin sentyabrında isə bu göstərici 46 trln. dollar təşkil edib. Maliyyə bazarlarının ən aşağı səviyyəsi cari ilin mart ayında olub və bundan sonra bazar kapitallaşması 2 dəfə yüksəlib.

Ümumulikdə, mart ayında dünyanın əsas fond indekslərinin kəskin artımı müşahidə olunub:

İndeks	Ölkə	Artım, %
Dow Jones	ABŞ	53
FTSE 100	Böyük Britaniya	48
DAX	Almaniya	57
CAC 40	Fransa	51
Nikkei 225	Yaponiya	44
Hang Seng	Honkonq	94
CSI 300	Çin	53
BSE SENSEX 30	Hindistan	108
BOVESPA	Braziliya	84
KOSPI	Koreya	63

Fond bazarlarının kəskin artması ilk növbədə aparıcı dövlətlərin maliyyə daxilolmaları, iqtidsadi böhranın yaxın zamanda başa çatması ilə bağlı proqnozlar, fərdi investorların bazara qayıtması nəticəsində baş verib. Bununla yanaşı daha bir vacib amil qeyd olunmalıdır. Belə ki, dünya maliyyə sisteminə yönəldilmiş vəsaitlər real iqtisadiyyata hələ çatmayıb və bu səbəbdən yaxın aylar ərzində maliyyə bazarlarında baş verən yüksəlmə tendensiyalarının real iqtisadiyyat, istehsal və istehlak tərəfindən dəstəklənməsini gözləmək olar. Aydındır ki, istehsal böhrandan əvvəlki səviyyəyə çatanda bank sistemində kreditləşmə bərpa olunarsa böhrandan çıxış daha tez və problemsiz olacaq.