Maliyyə

Ana səhifə

Maliyyə

«Azər-Türk Bank» Qara Dəniz Ticarət və İnkişaf Bankı ilə kredit sazişi bağlayıb

21 oktyabr 2009 10:07 (UTC +04:00)

Bakı. Vahab Rzayev – APA-Economics. Bu gün Bakıda «Azər-Türk Bank» Səhmdar Kommersiya Bankı ilə Qara Dəniz Ticarət və İnkişaf Bankı (QTİB) arasında kredit sazişi imzalanıb. «APA-Economics»in məlumatına görə, saziş «Azər-Türk Bank»ın İdarə Heyətinin sədri Mehmet Acarözmen və QTİB-in prezidenti Hayrettin Kaplan tərəfindən imzalanıb. Saziş «Azər-Türk Bank»a 5 il müddətinə 4 mln. ABŞ dolları həcmində kreditin ayrılmasını nəzərdə tutur.

M.Acarözmenin sözlərinə görə, bu kredit QTİB-lə əməkdaşlığın başlanğıcdır və gələcəkdə kreditin məbləğinin artırılması planlaşdırılır. Belə ki, kreditin miqdarı daha da böyük ola bilərdi, lakin M.Acarözmenin sözlərinə görə, hazırda Azərbaycan iqtisadiyyatında maliyyə vəsaitlərinin istifadə edilməsində müəyyən problemlər var və kreditin alınmasında onun gələcək istifadəsi nəzərdə tutulmalıdır. Hazırkı kredit üzrə maliyyələşdirmək artıq bir sıra layihə var və bunlar əsasən istehsal sahəsində kiçik və orta sahibkarlıqla bağlıdır.

Öz növbəsində H.Kaplan vurğulayıb ki, ayrılan kredit «Azər-Türk Bank»ın maliyyə resurs bazasını daha da genişləndirəcək və onun sahibkarlıq sektorunun kreditləşməsində imkanlarını artıracaq.

Qeyd edək ki, beynəlxalq maliyyə təşkilatı olan Qara Dəniz Ticarət və İnkişaf Bankı 1999-cu ildən fəaliyyət göstərir və regionun 11 ölkəsi tərəfindən təsis edilib. Bunlar Azərbaycan, Albaniya, Bolqarıstan, Rusiya, Gürcüstan, Yunanıstan, Moldova, Rumıniya, Ukrayna, Türkiyə və Ermənistandır.

«Azər-Türk Bank» SKB 1995-ci ildən fəaliyyət göstərir. Bankın səhmdarları rolunda Türkiyənin «Ziraat Bankası» (46%), «Ziraat Bank İnternational AG» (4%) və «Aqrarkredit» bank olmayan kredit təşkilatı (46%), «Turan Bank» ASC (4%) çıxış edir. Bankın aktivlərinin həcmi 2009-cu ilin oktyabr ayının 1-nə 49,706 mln. manat, kredit portfeli 26,334 mln. manat, o cümlədən istehlak kreditləri 10,321 mln. manat, bankın depozit portfeli 31,309 mln. manat təşkil edib. Bankın məcmu kapitalı 11,811 mln. manat, o cümlədən nizamnamə kapitalı 10 mln. manatdır. Son bir il ərzində bankın ümumi gəlirləri 1,3% artaraq 5,481 mln. manata, xərcləri isə 22% artaraq 3,766 mln. manata çatıb. Nəticədə, bankın əldə etdiyi mənfəət 26% azalaraq 1,715 mln. manat olub. Bundan başqa, bu müddət ərzində bank tərəfindən əlavə 1 bankomat və 13 POS-terminal quraşdırılıb. Bankın işçilərinin sayı isə 23,2% artaraq 101 nəfərə çatıb. Hazırda bankın ölkə üzrə 2 filialı, 4 bankomatı və 16 POS-terminalı fəaliyyət göstərir.