Maliyyə

Ana səhifə

Maliyyə

Maliyyə naziri Samir Şərifov: «Azərbaycanın 2009-cu il dövlət büdcəsinin icrası gözlənildiyi kimi olmayacaq»

21 oktyabr 2009 10:25 (UTC +04:00)

Bakı. Nicat Mustafayev – APA-Economics. Azərbaycanın 2009-cu il dövlət büdcəsinin icrası gözlənildiyi kimi olmayacaq. Buna baxmayaraq, əsas sosial proqramlar və investisiya layihələri maliyyələşdirilir.

«APA-Economics»in məlumatına görə, bunu jurnalistlərə verdiyi açıqlamasında Azərbaycanın maliyyə naziri Samir Şərifov bildirib. Onun sözlərinə görə, 2009-cu il üçün planlaşdırılan layihələrin bir neçəsi 2010-cu ilə keçirilib: «Bu da ilk növbədə neftin 1 barelinin büdcədə proqnozlaşdırılan 70 dollara qarşı 51 dollar səviyyəsində olması ilə bağlıdır. Bu isə büdcənin gəlirlərinə mənfi təsir göstərib».

Nazir digər mənfi amil kimi büdcə proqnozlaşdırılarkən əsas kimi Azərbaycan Beynəlxalq Əməliyyat Şirkətinin (ABƏŞ) hasilat və bundan ödəniləcək mənfəət vergisi üzrə proqnozların götürülməsini göstərib: «Ancaq ABƏŞ-də «Azəri» yatağı ilə bağlı yaranmış texniki problemlər hasilata, bu isə mənfəət vergisinə və nəticədə, büdcə gəlirlərinə təsir edib».

S.Şərifovun sözlərinə görə, qlobal maliyyə böhranı Azərbaycanın ticarət dövriyyəsinə mənfi təsir edib: «İstehlak, nəqliyyat axını azalıb ki, bu da büdcə gəlirlərinə mənfi təsir edib. Buna baxmayaraq, əmək haqqı, pensiya və müavinətlərin ödənişində heç bir problem müşahidə olunmayıb».

Maliyyə naziri qeyd edib ki, digər ölkələrdə ümumi daxili məhsulun (ÜDM) 10-14% azalması müşahidə olunub: «Azərbaycanda isə cari ilin 9 ayının nəticələrinə görə, ÜDM üzrə 6,1% artım olub. MDB məkanında və regionda müşahidə olunan ÜDM-in azalması və devalvasiya da böhranın müəyyən təsirlərinə baxmayaraq, Azərbaycanda qeydə alınmayıb».