Maliyyə

Ana səhifə

Maliyyə

Azərbaycan Beynəlxalq Bankı son bir ildə mənfəətini 4,3 dəfə artırıb

22 oktyabr 2009 07:43 (UTC +04:00)

Bakı. Elnur Hüseynquluyev – APA-Economics. Azərbaycan Beynəlxalq Bankının (ABB) aktivlərinin həcmi 2009-cu ilin oktyabr ayının 1-nə 4 758,574 mln. manat təşkil edib ki, bu da ötən ilin analoji dövrü ilə müqayisədə 13% çoxdur.

ABB-nin baş ofisindən «APA-Economics»ə verilən məlumata görə, hesabat dövründə bankın depozit portfeli 17,9% azalaraq 1 944,185 mln. manat, kredit portfeli 36,7% artaraq 3 596,347 mln. manat, o cümlədən istehlak kreditlərinin həcmi 9,6% artaraq 345,947 mln. manat olub. Bu müddət ərzində bankın məcmu kapitalı 37,5% artaraq 452,106 mln. manat, o cümlədən nizamnamə kapitalı 54% artaraq 200 mln. manat təşkil edib.

Qeyd edək ki, ötən ilin müvafiq dövrünün göstəricisi ilə müqayisədə bankın gəlirləri 2,9 dəfə artaraq 300,570 mln. manat, xərcləri isə 2,3 dəfə artaraq 174,718 mln. manat olub. Nəticədə, bankın mənfəəti son bir ildə 4,3 dəfə artaraq 125,852 mln. manata çatıb. Bununla yanaşı, bank son bir ildə əlavə 1 filial açıb, həmçinin 84 POS-terminal quraşdırıb.

Xatırladaq ki, Azərbaycan və regionun ən iri bank kredit təşkilatı olan ABB 1992-ci ildən fəaliyyət göstərir. Bankın nizamnamə kapitalında dövlətin iştirak payı 50,2% təşkil edir. Səhmlərin qalan 40%-i xüsusi mülkiyyətdədir, 10%-i isə bankın əmək kollektivinə məxsusdur. Hazırda bankın respublika üzrə 37 filialı, 587 bankomatı və 2717 POS-terminalı mövcuddur.