Maliyyə

Ana səhifə

Maliyyə

Gələn həftə «Azərpoçt» MMC-yə bank və maliyyə xidmətlərinin göstərilməsinə dair lisenziya verilə bilər

13 aprel 2010 08:32 (UTC +04:00)

Bakı. Vüqar Mustafayev - APA-Economics. Azərbaycan Mərkəzi Bankı (AMB) gələn həftə «Azərpoçt» MMC-yə bank və maliyyə xidmətlərinin göstərilməsinə dair lisenziya verə bilər.

«APA-Economics»in məlumatına görə, bu barədə jurnalistlərə açıqlamasında AMB-nin İdarə Heyətinin sədri Elman Rüstəmov bildirib.

Onun sözlərinə görə, hazırda layihənin həyata keçirilməsi ilə bağlı Rabitə və İnformasiya Texnologiyaları Nazirliyi və AMB intensiv iş aparır. Ölkə ərazisinin rabitə əlaqəsi ilə maksimum əhatə edilməsi üçün müvafiq tədbirlər görülür və bu istiqamətdə prosesə ölkənin bütün rayon və kəndlərinin cəlb edilməsi nəzərdə tutulub.

Ölkənin baş bankiri həmçinin bildirib ki, rabitə, o cümlədən internet əlaqəsi ilə əhatə olunacaq kəndlərdə hətta bütün evlərin informasiya cəmiyyətinə qoşulması üçün imkanlar yaradılacaq.

Qeyd edək ki, «Azərpoçt» yaxın 3 ildə bank və maliyyə xidmətləri bazarının 20-25% payını əldə etməyi nəzərdə tutur. İlkin məlumata əsasən, “Azərpoçt”un göstərdiyi bank və maliyyə xidmətlərinin qiymətləri Azərbaycan bazarında mövcud olan qiymətlərdən aşağı olacaq. Yerli ekspertlərin proqnozlarına görə, yaxın gələcəkdə “Azərpoçt”un gəlirlərinin 60%-i məhz bank xidmətlərinin payına düşəcək.

«Azərpoçt»un 2009-2011-ci illəri əhatə edən fəaliyyət strategiyasının əsas istiqamətləri yeni maliyyə-bank xidmətlərinin tətbiqi və ümumiyyətlə, müəssisənin rentabelliyinin artırılmasından ibarətdir. RİTN mütəxəssislərinin sözlərinə görə, müəssisə artıq bu ildən mənfəətlə işləməyə başlayacaq, 2011-ci ildən isə illik mənfəətin 20%-dək artımı gözlənilir.