Maliyyə

Ana səhifə

Maliyyə

Azərbaycanda islam bankçılığının geniş tətbiqinə dair araşdırmalar aparır

14 aprel 2010 07:55 (UTC +04:00)

Bakı. Nicat Mustafayev – APA-Economics. Azərbaycan hökuməti ölkədə islam bankçılığının tətbiqinə dair müzakirələr aparır. «APA-Economics»in məlumatına görə, bunu Azərbaycan Mərkəzi Bankı (AMB) İdarə Heyətinin sədri Elman Rüstəmov bildirib.

Onun sözlərinə görə, islam bankçılığı bank sektorunda maraqlı məsələdir ki, hazırda AMB tərəfindən bu növ bankçılığın ölkədə tətbiqi imkanları araşdırılır, öyrənilir: «Buna baxmayaraq, Azərbaycanda islam bankçılığına dair huqüqi-normativ baza mövcud deyil və bu növ bankçılığa ölkənin ümumi bank strategiyası çərçivəsində baxılacaq».

E.Rüstəmov həmçinin qeyd edib ki, bütün bunlara baxmayaraq, AMB ölkənin bank sisteminin inkişafı məsələsində klassik bankçılığa üstünlük verir.

Xatırladaq ki, hazırda Azərbaycanda yalnız «Kövsər Bank» fəaliyyətini sırf islam bankçılığı prinsipləri əsasında qurub. Bundan başqa, «Turanbank» kreditləşmədə islam bankçılığının tətbiqinə başlayıb, həmçinin bununla bağlı «Amrahbank» ciddi şəkildə hazırlıq işləri, Azərbaycan Beynəlxalq Bankı isə araşdırmalar aparır.