Maliyyə

Ana səhifə

Maliyyə

Bakıda keçirilən beynəlxalq bank konfransı başa çatıb

14 aprel 2010 12:40 (UTC +04:00)

«APA-Econonmics»in məlumatına görə, konfransın ikinci gününün əsas mövzusu «Böhran dövründə İslam bank fəaliyyəti prinsiplərinin yüksək effektivliyi və bunun üçün əsaslar» olub.

Konfransda çıxış edən iqtisadçı ekspert Zahid Fərrux Məmməd böhranın yaranma səbəbləri, onun yaratdığı fəsadlar və bankların böhranqabaqlayıcı tədibirləri haqqında danışıb. Z.Məmməd Azərbaycanda fəaliyyət göstərən bank kredit təşkilatlarının nəzdində nəşriyyat evlərinin yaradılması təklifini irəli sürüb.

Tədbirdə çıxış üçün söz alan Qara Dəniz Ticarət və İnkişaf Bankının (QDTİB) maliyyə institutları üzrə direktoru Nejdet Sarısözən maliyyə böhranı şəraitində QDTİB-in həyata keçirdiyi konservativ maliyyə proqramlarından danışıb.

Daha sonra Azərbaycanın «Amrahbank» ASC-nin Biznesin inkişafı Departametinin direktoru Xaliq İldırımzadə bankın yaranma tarixi, fəaliyyət prinsipi və islam bankıçılığının tətbiqi ilə bağlı apardığı hazırlıq işlərindən danışıb.

Konfransın sonunda İslam iqtisadiyyatı üzrə Beynəlxalq Assosiasiyanın prezidenti Mabid Əli Əl-Carhi çıxışında islam bankçılığı prinsipləri və onun klassik bankçılıqla olan fərqini ətraflı açıqlayıb. «Əgər klassik bankçılıqda depozitar-bank arasında və bank-borcalan arasında münasibətlər faiz əsasında qurulursa, İslam bankçılığında faiz anlayışı olmadığından münasibətlər mənfəətin və ya zərərin bölüşdürülməsi əsasında qurulur».

«Dar Al Sharia» şirkətinin prezidenti Hüseyn Həmid Həssən isə islam bakçılığı ilə bağlı artıq bir neçə dövlətin bu sahədə müvafiq qanunlar qəbul etdyini bildirib.

Qeyd edək ki, konfransda Azərbaycan, Gürcüstan, Qazaxıstan, Rusiya, Ukrayna, Türkiyə və digər ölkələrin mərkəzi bankları, maliyyə nazirlikləri, bank assosiasiyaları və digər maliyyə strukturlarından olan yüksək vəzifəli nümayəndələri iştirak edib.

Konfrans və sərgiyə Azərbaycan Mərkəzi Bankı, Azərbaycan Banklar Assosiasiyası və Avropa Yenidənqurma və İnkişaf Bankı (EBRD) tərəfindən dəstək verilib. Azərbaycanın «Amrahbank» ASC və «PricewaterhouseCoopers» beynəlxalq audit şirkəti tədbirin sponsorları qismində çıxış edib. Sərgi-konfransın əsas təşkilatçısı isə «Iteca Caspian» şirkətidir.

Qeyd edək ki, APA İnformasiya Agentliyi bank-maliyyə konfransında baş onlayn dəstək statusu ilə iştirak edib.