Maliyyə

Ana səhifə

Maliyyə

«DəmirBank» plastik kart sahiblərinə «İnternet-bank» xidmətini təklif edir

16 iyun 2010 12:57 (UTC +04:00)

Bakı. Elnur Hüseynquluyev – APA-Economics. Azərbaycanın «Dəmirbank» ASC-nin plastik kart sahibləri həftənin bütün günləri 24 saat ərzində yeni tətbiq edilən «İnternet-bank» xidmətindən istifadə edə bilər.

Bankın baş ofisindən «APA-Economics»ə verilən məlumata görə, «İnternet-bank» xidməti bankın plastik kart sahiblərinə «Azercell» və «Bakcell» Mobil rabitə operatorlarının ödənişlərini aparmaq, «Card-to-Card» əməliyyatlarını həyata keçirmək, kart üzrə çıxarışları əldə etmək imkanı verir.

«İnternet-bank» xidməti ilə yanaşı müştərilərə «SMS-bank» xidmətinin əlavə olunduğu xüsusi xidmət paketi də təklif olunur.

Bankın İdarə Heyəti sədrinin müavini Yusif Cabbarovun sözlərinə görə, plastik kartlar sahəsində bank müştərilər üçün son zamanlar bir sıra yeni xidmətlər və kampaniyalar tətbiq edib. «İnternet-bank» xidmətinin tətbiqi plastik kart sahiblərinə bu sahədə müasir imkanlardan yararlanmağa və kartlardan daha rahat istifadəyə imkan verəcək. «Plastik kartların inkişafı konsepsiyasına uyğun olaraq, biz plastik kartlar üzrə xidmətlərin və xidmət keyfiyyətinin artırılması üzrə digər yeniliklər də etməyi nəzərdə tuturuq», – deyə Y.Cabbarov bildirib.

Xatırladaq ki, «DəmirBank» (əvvəlki «Azərdəmiryolbank») 1989-cu ildə fəaliyyətə başlayıb. Bankın səhmdarları sırasına beynəlxalq maliyyə təşkilatları olan Avropa Yenidənqurma və İnkişaf Bankı və Hollandiya İnkişaf Maliyyə Şirkəti (FMO) daxildir.