Maliyyə

Ana səhifə

Maliyyə

«Günay Sığorta» şirkəti yaxın bir aya lisenziyasını bərpa edəcək

17 iyun 2010 07:42 (UTC +04:00)

Bakı. Elnur Hüseynquluyev - APA-Economics. Azərbaycanın «Günay Sığorta» şirkəti iyul ayının 5-dək Maliyyə Nazirliyi tərəfindən dayandırılan lisenziyasını bərpa etmək niyyətindədir. Bunu «APA-Economics»ə şirkətin baş mühasibi Həlimə Əliyeva bildirib.

H.Əliyevanın sözlərinə görə, elan edilmiş 0,9 mln. manatlıq əlavə səhm emissiyası iyun ayının sonunadək tam olaraq yerləşdiriləcək və bununla da şirkətin nizamnamə kapitalı 2,5 mln. manata çatdırılacaq.

Qeyd edək ki, bu ilin may ayının 7-dən etibarən Azərbaycan Maliyyə Nazirliyinin Dövlət Sığorta Nəzarəti Xidməti «Günay Sığorta», «Amrah Sığorta» və «Azal Sığorta» şirkətlərinin sığorta fəaliyyətinə verilən lisenziyaların qüvvəsini dayandırıb. Lisenziyanın dayandırlmasına əsas səbəb kimi həmin şirkətlərin maliyyə sabitliyi və ödəmə qabiliyyəti normativlərinə əməl olunmasının təmin edilməsi barədə dövlət sığorta nəzarəti orqanı tərəfindən verilən təqdimatları icra etməmələri göstərilir.

Nazirlikdən həmin şirkətlərə maliyyə sabitliyi və ödəmə qabiliyyəti normativlərinə əməl olunmasının təmin edilməsi ilə bağlı 6 ay vaxt verilib. Bu vaxt çərçivəsində normativlərə əməl etməyən şirkətlərin lisezniyaları ləğv ediləcəyi bildirilib. Artıq «Amrah Sığorta» bütün tələbləri yerinə yetirib.

Xatırladaq ki, ölkədə fəaliyyət gösətən sığorta şirkətləri üçün minimum məcmu kapital tələbi 2010-cu il yanvar ayının 1-nə 2 mln. manat həcmində olmalıdır. Bu məbləğ 2011-ci il yanvarın 1-nə 3,5 mln. manata, 2012-ci il yanvar ayının 1-nə isə 5 mln. manata çatdırılmalıdır. Yeni yaradılan sığorta şirkətləri üçün isə minimum kapital tələbi 5 mln. manat təşkil edir.

Qeyd edək ki, «Günay Sığorta» şirkəti 1992-ci ildən fəaliyyət göstərir. Şirkət əvvəllər xarici kapitallı yerli hüquqi şəxs formasında fəaliyyət göstərib. Belə ki, şirkətin nizamnamə kapitalının 51%-ni yerli, 49%-ni xarici kapital təşkil edib. Lakin nizamnamə kapitalında edilən dəyişikliyə əsasən, şirkət 100% yerli şirkətə çevrilib. Hazırda şirkətin səhmdarları sırasına «Günaybank» (34,62%) və iki yerli fiziki şəxs (65,38%) daxildir. Hazırda şirkət 2 icbari və 18 könüllü sığorta növü üzrə xidmət göstərir.