Maliyyə

Ana səhifə

Maliyyə

Azərbaycana cəlb edilən xarici kapitalın həcmi son bir ildə 70% artıb

17 iyun 2010 13:28 (UTC +04:00)

Bakı. Vahab Rzayev – APA-Economics. Azərbaycanın 2010-cu ilin I rübün yekunları üzrə tədiyyə balansında əks olunmuş xaricdən cəlb olunan kapitalın ümumi məbləği 1,9 mlrd. ABŞ dolları təşkil edib ki, bu da ötən ilin müvafiq göstəricisindən 70% çoxdur.

Azərbaycan Mərkəzi Bankından «APA-Economics»ə verilən məlumatına görə, bu göstərici əsasən ölkəyə cəlb olunmuş birbaşa investisiyaların və xarici kreditlərin hesabına formalaşıb:

(mln. dollar)

Cəlb olunan xarici kapitalın strukturu
	2009-cu il, I rüb	2010-cu il, I rüb
Birbaşa investisiyalar	760,7	704,7
- neft-qaz sektoru	510,8	596,4
- digər sektorlar	249,9	108,3
Kreditlər və digər investisiyalar	321,5	1 161,6
- dövlət təminatlı kreditlər	86,8	154,7
- dövlət təminatlı olmayan kreditlər	127,8	732,9
-- neft-qaz sektoru	26,3	123,0
-- banklar	84,0	527,4
-- digərləri	17,5	82,5
- digər investisiyalar	106,9	274,0
CƏMİ	1 082,2	1 866,3

Mərkəzi Bankın tədiyyə balansının şərhinə əsasən, birbaşa investisiyalar formasında xaricdən cəlb olunmuş sərmayələrin ümumi məbləği 704,7 mln. dollar olub ki, bu investisiyaların strukturunda neft-qaz sektorunun xüsusi çəkisi 84,6% təşkil edir. Öz növbəsində həmin sərmayələr iri neft-qaz layihələri, əsasən “Şahdəniz” layihəsi və “Azəri-Çıraq-Günəşli” yataqlarında görülən işlərin maliyyələşdirilməsi ilə əlaqədar ölkə iqtisadiyyatında istifadə olunub.

Kreditlər və digər investisiyalar formasında cəlb olunmuş sərmayələrin xüsusi çəkisi xarici kapitalın strukturunda 2 dəfə artaraq 62,2% təşkil edib. Bu da əsasən dövlət təminatı olmayan cəlb olunmuş kreditlərin artması ilə bağlıdır. Nəticədə, 2010-cu ilin ilk rübündə cəlb olunmuş kredit və digər investisiyaların ümumi məbləği 1 161,6 mln. dollar təşkil edib. Bu məbləğin 13,3%-i birbaşa dövlət və dövlət təminatı əsasında cəlb olunmuş kreditlər, 86,7%-i isə dövlət təminatı olmayan kreditlər və digər investisiyalarıy payına düşür.