Maliyyə

Ana səhifə

Maliyyə

Azərbaycanın gəlirlər üzrə mənfi saldosu kəskin artıb

17 iyun 2010 14:27 (UTC +04:00)

Bakı. Vahab Rzayev – APA-Economics. Azərbaycanın 2010-cu ilin I rübü üzrə tədiyə balansında əks etdirilən gəlirlər üzrə daxilolmalar və ödənişlərin ümumi dövriyyəsi 1 000,7 mln. ABŞ dolları təşkil edib. Azərbaycan Mərkəzi Bankından «APA-Economics»ə verilən məlumata görə, bunun 898 mln. dolları və ya 89,7%-i Azərbaycandan həyata keçirilən ödənişlərin payına düşüb.

Azərbaycandan ödənişlərin əsas hissəsini (685,3 mln. dollar) beynəlxalq neft-qaz konsorsiumlarının xarici investorlarının payına düşən gəlirlərin repatriasiyası (əsasən xam neft şəklində), qeyri-rezidentlərə ödənilmiş əmək haqları (25,9 mln. dollar) və xarici kreditlər üzrə ödənilən faizlər (38,1 mln. dollar) təşkil edib.

Ölkəyə daxil olan gəlirlər 2010-cu ilin ilk rübündə 102,6 mln. dollar olub. Bunun əsas hissəsi Dövlət Neft Fondu və Mərkəzi Bankın xətti ilə daxil olan vəsaitlərin payına düşüb. Belə ki, 62,2 mln. dolları Dövlət Neft Fondunun vəsaitləri, 5,9 mln. dolları Mərkəzi Bankın sərəncamında olan xarici valyuta ehtiyatları, 1,9 mln. dolları isə bankların xaricdə yerləşdirilmiş aktivlərinə hesablanmış faizlər üzrə gəlirlər təşkil edib.

Beləliklə, 2010-cu ilin I rübü ərzində gəlirlər üzrə tədiyə balansında 795,4 mln. dollar məbləğində mənfi saldo yaranıb ki, bu da ötən ilin müvafiq dövrü ilə müqayisədə 3,7 dəfə çoxdur. Qeyd edək ki, ümumilikdə Azərbaycandan aparılan ödənişlər daxil olan ödənişləri 8,7 dəfə üstələyir.