Maliyyə

Ana səhifə

Maliyyə

Azərbaycan parlamenti 2010-cu il dövlət büdcəsinə dəyişiklikləri təsdiq edib - YENİLƏNİB

Azərbaycan parlamenti 2010-cu il dövlət büdcəsinə dəyişiklikləri təsdiq edib - <font color=red>YENİLƏNİB</font>

18 iyun 2010 10:58 (UTC +04:00)

«APA-Economics»in məlumatına görə, iclasda çıxış edən iqtisadi siyasət komitəsinin sədri Ziyad Səmədzadə bildirib ki, cari ilin yanvar-may aylarında ölkə iqtisadiyyatında dinamik artım müşahidə olunub. Ümumilikdə, cari ilin əvvəlindən dünyada və ölkədə baş verən proseslər, eləcə də dünya bazarlarında neftin qiymətinin artması büdcəyə əlavə və dəyişikliklər etmək zərurətini yaradıb. Komitə sədri onu da əlavə edib ki, Hesablama Palatası tərəfindən büdcə ilə bağlı rəyini də təqdim edib.
«Bu gün dünya bazarında neftin orta qiyməti faktiki 75,5 dollardır və bu, əlavə vəsaitlərin daxil olmasına şərait yaradıb. Dəyişikliklərlə büdcə kəsiri 2,3% olacaq», - deyə Z.Səmədzadə vurğulayıb.
Z.Səmədzadə cari ilin yanvar-aprel aylarının nəticələrindən də danışıb. Vergi ayırmaları üzrə daxilolmalar artıqlaması ilə yerinə yetirilib. Azərbaycan Dövlət Neft Fondunun əlavə gəlirləri isə 1,9 mlrd. manat təşkil edib. Büdcənin mədaxil hissəsinin 1,5 mlrd. manat artırılması nəzərdə tutulur. Komitə sədri onu da vurğulayıb ki, gəlirlərin belə artımı şəraitində ölkə üzün zəruri olan bir sıra xərclərin artırılmasına da zərurət yaranıb.
Komitə sədri onu da vurğulayıb ki, ayrılan vəsaitin böyük bir hissəsi müdafiə xərclərinin artırılmasına yönəldiləcək.
Daha sonra çıxış edən maliyyə naziri Samir Şərifov bildirib ki, layihədə Azərbaycanın 2010-cu il dövlət büdcəsinin gəlirlərinin 1 490 mln. manat, xərclərinin isə 1 011,3 mln. manat artırılması təklif olunur. Artımla da dövlət büdcəsinin gəlirləri 11 505 mln. manat, xərcləri isə 12 275,3 mln. manat təşkil edəcək. Gəlirlərin artımının 490 mln. manatı Vergilər Nazirliyi, 1 mlrd. manatı isə Dövlət Neft Fondundan transfertlər hesabına formalaşacaq. Bununla da Vergilər Nazirliyinin xətti ilə büdcəyə daxil olması planlaşdırılan vəsaitlərin həcmi 4 470 mln. manat olacaq. Proqnozlaşdırılan büdcə kəsirinin məbləği 478,7 mln. manat azaldılacaq.
Nazir bildirib ki, xərclərin artırılmasına bir sıra amillər əsas verir. Kür və Araz çaylarının yaratdığı sel fəlakətinin fəsadlarının aradan qaldırılması və gələcəkdə anoloji halların baş verməməsi üçün tədbirlərin maliyyələşdirilməsinə 300 mln. manat ayrılır: «Müdafiə xərclərinə 400 mln. manat əlavə ediləcək. Bu, geosiyasi vəziyyət nəzərə alınaraq ölkənin müdafiə potensialının yüksəldilməsi məqsədi daşıyır. Naxçıvanda bir sıra infrastruktur layihələrinin həyata keçirilməsinə 17 mln. manat, yol layihələrinin başa çatdırılması, Bakı şəhərində tarixi əhəmiyyətli binaların bərpası, rayonlarda su və kanaliza siyasistemlərinin yaxşılaşdırılmasına 129 mln. manat, elmə 3 mln. manat, səhiyyəyə 10 mln. manat ayrılır. Naxçıvan Muxtar Respublikasına dövlət büdcəsinin dotasiyası 2,7 mln. manat artırılacaq. Dövlət büdcəsinin kəsiri ÜDM-in 2,3%-ni təşkil edəcək».
Maliyyə naziri həmçinin əlavə edib ki, yerli gəlir və xərcləri tənzimləmək üçün dövlət büdcəsinin mərkəzləşdirilmiş xərclərindən ayrılan vəsaitin məbləği 31 mln. manat və ya 4,2% artırılacaq. Təsdiq olunmuş layihədə 2010-cu il icmal büdcəsinin gəlirlərinin 3 194 mln. manat və ya təsdiq olunmuş büdcəyə nisbətən 26,9% artırılması nəzərdə tutulur. Artımın 2,7 mlrd. manatını ARDNF-in gəlirləri, 490 mln. manatını dövlət büdcəsinin gəlirləri, 3,5 mln. manatını Naxçıvan Muxtar Respublikası büdcəsinin gəlirləri təşkil edəcək. İcmal büdcənin xərcləri isə təsdiq olunmuş büdcəyə nisbətən 13,6% və ya 1 715 mln. manat artaraq 14 351 mln.manata, onun profisiti isə 727,8 mln. manat səviyyəsinə qalxacaq. ARDNF-in 1 mlrd. manat əlavə xərcini dövlət büdcəsinə transfertlər təşkil edəcək.
Daha sonra çıxış edən millət vəkilləri büdcəyə dəyişikliklərlə bağlı fikrlərini bildiriblər. Müdafiə xərclərinin artırılmasının doğru addım olduğunu deyən millət vəkili Zahid Oruc hərbçilərin, zabit və gizir heyəti, onların ailələrinin sosial vəziyyətinin yaxşılaşdırılması istiqamətində daha geniş tədbirlərin həyata keçirilməsinin vacibliyini vurğulayıb.
Deputat Cəmil Həsənli isə əhalinin sovet dövründə banklara qoyduğu əmanətlərin qaytarılmasına şərait yarandığını qeyd edib. C.Həsənli bildirib ki, artıq bunun üçün əlverişli mühit yaranıb və dövlətin bu vəsaiti qaytarmaq imkanı var.
Deputat Nazim Məmmədov isə Maliyyə Nazirliyinin yerli strukturlarında islahatların aparılmasının vacibliyini önə çəkib. N.Məmmədov bildirib ki, maliyyə şəffaflığını təmin etmək, eləcə də digər neqativ halların qarşısını almaq üçün Vergilər Nazirliyində olduğu kimi islahatların aparılmasına, rayon idarələrinin regional idarələrdə birləşdirilməsinə zərurət yaranıb.
Daha sonra qanun layihəsi millət vəkillərinin müzakirəsinə təqdim olunub və sonda sənəd səs çoxluğu ilə təsdiq olunub.