Maliyyə

Ana səhifə

Maliyyə

Bakıda “Azərbaycan: iqtisadi inkişaf, sosial nailiyyətlər və mədəni quruculuq” toplusunun təqdimatı keçirilib

16 iyul 2010 09:56 (UTC +04:00)

Bakı. Nicat Mustafayev - APA-Economics. Bu gün Bakıda Azərbaycan İqtisadi İnkişaf Nazirliyinin İqtisadi İslahatlar Elmi-Tədqiqat İnstitutu tərəfindən hazırlanmış «Azərbaycan: iqtisadi inkişaf, sosial nailiyyətlər və mədəni quruculuq» toplusunun təqdimatı keçirilib.

«APA-Economics»in məlumatına görə, tədbirdə çıxış edən İqtisadi İslahatlar Elmi-Tədqiqat İnstitutunun direktoru Vilayət Vəliyev toplunun iqtisadi və sosial sahədə əldə olunmuş nailiyyətlər, Azərbaycanda həyata keçirilən dövlət proqramlarının icrasının nəticəsini əks etdirdiyini bildirib, toplunun ölkənin sosial-iqtisadi potensialı və digər dolğun məlumatların təqdim edilməsi məqsədilə hazırlandığını qeyd edib.

Ümumiyyətlə, topluda ölkənin ümumi daxili məhsulu, qiymət indeksləri, büdcə gəlirləri və xərcləri, pul kütləsi, valyuta ehtiyatları, tədiyyə balansı, idxal-ixrac strukturu, kənd təsərrüfatı məhsullarının istehsalı, neft-qaz hasilatı, əhaliyə göstərilən pullu xidmətlər, pərakəndə əmtəə dövriyyəsi, ölkə iqtisadiyyatına yatırılan xarici investisiyalar və bu kimi göstəricilər qrafik və cədvəl şəklində əks olunub. Yaxın gələcəkdə sözügedən toplunun kitab şəklində nəşr olunması da nəzərdə tutulub.

Bundan başqa, tədbir çərçivəsində İqtisadi İslahatlar Elmi-Tədqiqat İnstitutu və Azərbaycan Milli Elmlər Akademiyasının İqtisadiyyat İnstitutu arasında elmi-tədqiqat sahəsində əməkdaşlıq haqqında müqavilə imzalanıb. Müqavilədə bir sıra sahə üzrə birgə elmi layihələrin və tədqiqatların həyata keçirilməsi, elmi kadrların hazırlanması, həmçinin elmi-praktiki müşavirə, simpozium, konfrans və seminarların keçirilməsi nəzərdə tutulur.