Maliyyə

Ana səhifə

Maliyyə

«Günay Sığorta» nizamnamə kapitalını artırır

21 iyul 2010 15:43 (UTC +04:00)

Bakı. Nicat Mustafayev - APA-Economics. Azərbaycan Qiymətli Kağızlar üzrə Dövlət Komitəsi «Günay Sığorta» ASC-nin adi adlı sənədsiz səhmlərini dövlət qeydiyyatına alıb.

Bakı Fond Birjasından (BFB) «APA-Economics»ə verilən məlumata görə, səhmlərin hər birinin nominal dəyəri 1 000 manat, sayı 1 050 ədəd, emissiyanın ümumi həcmi isə 1,050 mln. manat təşkil edir. Yerləşdirmə kütləvi təklif üsulu ilə BFB vasitəsi ilə keçiriləcək və uğurla başa çatacağı təqdirdə, şirkətin nizamnamə kapitalı 65,6% artaraq 2,65 mln. manata çatacaq. Səhmlərin yerləşdirilməsində anderrayter rolunda «Standard Capital» çıxış edəcək.

Qeyd edək ki, bu ilin may ayının 7-dən etibarən Azərbaycan Maliyyə Nazirliyinin Dövlət Sığorta Nəzarəti Xidməti «Günay Sığorta», «Amrah Sığorta» və «Azal Sığorta» şirkətlərinin sığorta fəaliyyətinə verilən lisenziyaların qüvvəsini dayandırıb. Lisenziyanın dayandırılmasına əsas səbəb kimi həmin şirkətlərin maliyyə sabitliyi və ödəmə qabiliyyəti normativlərinə əməl olunmasının təmin edilməsi barədə dövlət sığorta nəzarəti orqanı tərəfindən verilən təqdimatları icra etməməsi göstərilir.

Nazirlikdən həmin şirkətlərə maliyyə sabitliyi və ödəmə qabiliyyəti normativlərinə əməl olunmasının təmin edilməsi ilə bağlı 6 ay vaxt verilib. Bu vaxt çərçivəsində normativlərə əməl etməyən şirkətlərin lisenziyalarının ləğv ediləcəyi bildirilib. Artıq «Amrah Sığorta» və «Azal Sığorta» bütün tələbləri yerinə yetirib.

Xatırladaq ki, ölkədə fəaliyyət göstərən sığorta şirkətləri üçün minimum məcmu kapital tələbi 2010-cu il yanvar ayının 1-nə 2 mln. manat həcmində olmalıdır. Bu məbləğ 2011-ci il yanvarın 1-nə 3,5 mln. manata, 2012-ci il yanvar ayının 1-nə isə 5 mln. manata çatdırılmalıdır. Yeni yaradılan sığorta şirkətləri üçün isə minimum kapital tələbi 5 mln. manat təşkil edir.

Qeyd edək ki, «Günay Sığorta» şirkəti 1992-ci ildən fəaliyyət göstərir. Şirkət əvvəllər xarici kapitallı yerli hüquqi şəxs formasında fəaliyyət göstərib. Belə ki, şirkətin nizamnamə kapitalının 51%-ni yerli, 49%-ni xarici kapital təşkil edib. Lakin nizamnamə kapitalında edilən dəyişikliyə əsasən, şirkət 100% yerli şirkətə çevrilib. Hazırda şirkətin səhmdarları sırasına «Günaybank» (34,62%) və iki yerli fiziki şəxs (65,38%) daxildir. «Günay Sığorta»nın hazırkı kapitalı 1,6 mln. manat təşkil edir. Şirkət yaxın bir ay ərzində lisenziyasını bərpa edəcək.