Maliyyə

Ana səhifə

Maliyyə

Azərbaycan Beynəlxalq Bankı səhmdarlarının ümumi yığıncağı keçirilib

23 iyul 2010 09:19 (UTC +04:00)

Bakı. Elnur Hüseynquluyev - APA-Economics. Azərbaycan Beynəlxalq Bankı ASC-nin səhmdarlarının ümumi yığıncağı keçirilib.

Bankın baş ofisindən «APA-Economics»ə verilən məlumata görə, Azərbaycanın maliyyə naziri Samir Şərifovun sədrliyi ilə keçirilən yığıncaqda üç məsələ müzakirə edilib, bankın kənar auditor tərəfindən təsdiqlənmiş və Audit Komitəsi tərəfindən tövsiyə edilmiş 2009-cu ilin maliyyə hesabatlarının təsdiq edilməsi, 2009-cu ilin mənfəəti və dividend siyasəti, bankın Audit Komitəsinin tərkibi haqqında qərarlar qəbul edilib.

Ümumi yığıncağın qərarı ilə 2009-cu ilin maliyyə hesabatları təsdiq edilib. Ötən il üzrə bankın xalis mənfəəti 128 mln. manat həcmində olub və ötən ilin birinci və ikinci rübləri üzrə 46,7 mln. manat həcmində vəsait dividendlərin ödənilməsinə sərf edilib. Üçüncü rübdə mənfəətin bank tərəfindən dividendlərin ödənilməsi üçün nəzərdə tutulan 40 mln. manat hissəsi səhmdarların ümumi yığıncağının qərarı ilə bankın nizamnamə kapitalına yönəldilib. Ötən ilin sonuncu və cari ilin iki rübü üzrə Azərbaycan Beynəlxalq Bankı mənfəət əldə etmiş və mənfəətin bölünməsi ilə dividendlərin verilməsi barədə qərar qəbul edilməsini qanunvericiliyin tələblərinə uyğun olaraq səhmdarların ixtiyarına verib.

İkinci məsələ ilə əlaqədar iclasda iştirak edən və ümumilikdə səhmlərin 80%-nə malik səhmdarlar, Maliyyə Nazirliyi də daxil olmaqla 66% səs çoxluğu ilə dividendlərin rüblər üzrə deyil, illik olaraq ödənilməsi və növbəti ödənişin həyata keçirilməsi məsələsinə 2011-ci ildə baxılacağı barədə qərar qəbul ediblər. İclasda iştirak edən səhmdarların 34%-i bu qərarın əleyhinə səs veriblər.

İclasın gündəliyinin üçüncü bəndi üzrə qəbul edilən qərarla Audit Komitəsinin üzvlərinin say tərkibi 7 nəfərdən 5 nəfərə qədər azaldılıb. Qeyd edək ki, bankın səhmdarlarının 19 oktyabr 2009-cu il tarixli növbədənkənar ümumi yığıncağında ABB-nin aktivlərinin xeyli artması, fəaliyyət istiqamətlərinin genişlənməsi, törəmə müəssisə və nümayəndəliklərin sayının artması, filial şəbəkəsinin inkişaf etməsi şəraitində səhmdarların bankın menecmentinin işinə nəzarətin gücləndirilməsini əsas tutaraq səhmdarlar tərəfindən qəbul edilmiş qərara uyğun olaraq Audit Komitəsi üzvlərinin sayı 3 nəfərdən 7 nəfərə qədər artırılıb.

Bu gün ABB ölkənin ən kapitallaşdırılmış bankıdır. Bankın nizamnamə kapitalı 240 mln. manat təşkil edir. Cari ilin iyul ayının 1-nə bankın balans kapitalı 627,7 mln. manat səviyyəsindədir. ABB bu il Azərbaycanın büdcəsinə 22 mln. manat müxtəlif xarakterli vergi ödənişlərini həyata keçirib.

Cari ilin birinci yarım ilində bankın gəlirləri 189,98 mln. manat təşkil edib. Azərbaycanda dövlət nəzarətində olan yeganə bankın vergiyə qədər mənfəəti 41,4 mln. manat olub. Bank 31,5 mln. manat həcmində xalis mənfəət əldə edib.