Maliyyə

Ana səhifə

Maliyyə

Avropa İttifaqının Azərbaycandakı nümayəndəliyinin rəhbəri CEIBC prezidentini qəbul edib

13 sentyabr 2010 12:30 (UTC +04:00)

Bakı - APA-Economics. Bu gün Avropa İttifaqının Azərbaycandakı nümayəndəliyinin rəhbəri, səfir Rolan Kobia Xəzər-Avropa İnteqrasiya İşgüzar Klubunun (CEIBC) prezidenti və baş icraçı direktoru Telman Əliyevlə görüşüb.

CEIBC-dan “APA-Economics”ə verilən xəbərə görə, görüşdə səfir Avropa İttifaqı ölkələrinin biznes nümayəndələri arasında dialoqun təşkilinə imkan yaradan inteqrasiya layihələrinin həyata keçirilməsində CEIBC-ın xüsusi rolunu qeyd edib.

T.Əliyev bildirib ki, bu gün CEIBC-ə dünyanın 50 ölkəsinin 500 şirkəti daxildir. Onun sözlərinə görə, yaxın gələcəkdə şirkətlərin sayının 1000-ə, 2012-ci il üçün isə 5000-ə çatdırmaq planlaşdırılır. O, həmçinin R.Kobianın nəzərinə çatdırıb ki, CEIBC-ın fəxri sədri İlham Əliyevin təsdiqlədiyi plana əsasən, Aİ, MDB və GUAM ölkələrinin dövlət və hökumət rəhbərləri ilə görüşlər keçirilir. T.Əliyev Qazaxıstan, Rusiya, Ukrayna, Gürcüstan və Türkiyəyə gələcək səfərlər haqqında məlumat verib.

T.Əliyevin sözlərinə əsasən, CEIBC-in Aİ ərazisində fəaliyyətinin aktivləşdirilməsi məqsədi ilə, Brüsseldə CEIBC-in və Caspian Energy IMG-nin Aİ ölkələri ərazisində maraqlarını təmsil edən təşkilat yaradılacaq.

Görüş zamanı R.Kobia CEIBC-in rəhbərliyinə CEIBC-in üzv-şirkətlərin və iri şirkətlərin top-menecerlərinin iştirakı ilə Xəzər-Qara dəniz və Baltikyanı regionlarının ölkələrində beynəlxalq biznes-forumların və konfransların təşkil edilməsini tövsiyə edib. Onun fikrincə, bu, CEIBC-in beynəlxalq statusunu qaldıracaq, investisiya mühitinin yaxşılaşmasına və kiçik və orta biznesin inkişafına kömək edəcək.