Maliyyə

Ana səhifə

Maliyyə

Bakıda «İqtisadi inkişafın Azərbaycan modeli» mövzusunda beynəlxalq konfrans keçirilib

17 sentyabr 2010 09:53 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycanda Regional İnkişaf Mərkəzinin (ARİM) təşkilatçılığı ilə «İqtisadi inkişafın Azərbaycan modeli» mövzusunda beynəlxalq konfrans keçirilib.

«APA-Economics»in məlumatına görə, tədbirdə çıxış edən ARİM-in sədri Çinqiz İsmayılov qeyd edib ki, son illər ərzində dünya qlobal maliyə böhranına baxmayaraq, Azərbaycanda bir sıra dövlət proqramları və layihələrin icrası uğurla davam etdirilib. Ç.İsmayılov tədbir barədə məlumat verərək konfransda Azərbaycanın iqtisadi inkişafı modelinin müxtəlif şəkildə təhlil olunacağını bildirib.

Tədbirdə çıxış edən Azərbaycanın iqtisadi inkişaf naziri Şahin Mustafayev hazırda ölkə iqtisadiyyatının sürətlə inkişaf etdiyini bildirib və qeyd edib ki, hələ 1991-1994-cü illərdə Azərbaycanda ÜDM ildə təxminən 16,5% azalırdı, xarici tcarət dövriyyəsi 42%, əhalinin gəlirləri 3,3 dəfə, əmək haqları 5,7 dəfə, sənaye sahəsi isə 1993-cü ildə 1985-ci illə müqayisədə 50% azalmışdır: «Buna baxmayaraq, artıq 1995-2003-ci illər ərzində ölkədə ÜDM 90%, valyuta ehtiyatları 85 dəfə, əmək haqqları 5,1 dəfə, kənd təsərrüfatı sahəsi 53,9%, xarici ticarət dövriyəsi 4 dəfə artıb, inflyasiyanın səviyyəsi 2,3%-ə endirilib».

Nazir onu da bildirib ki, son 6 il ərzində Azərbaycanda 2 min məktəb inşa olunub, bu da ölkədə fəaliyyət göstərən ümumi məktəblərin 60%-ni təşkil edir: «Artıq Azərbaycan enerji idxalçısından ixrac edən ölkəyə çevrilib ki, ölkənin 85%-i qazlaşdırılıb».

Ş.Mustafayevin sözlərinə görə, 2004-2009-cu il ərzində Azərbaycan 140 ölkə ilə ticarət əlaqələri quraraq ticarət dövriyyəsini 2,9 dəfə artırıb: «Bu müddət ərzində ölkənin ÜDM 2,8 dəfə artıb. Ölkənin valyuta ehtiyatları isə azırda 26 mlrd. ABŞ dolları təşkil edir ki, bu da xarici dövlət borcundan 8 dəfə çoxdur».

Hazırda ölkənin biznes mühiti və ümumiyyətlə iqtisadiyyatı sürətlə inkişaf etdiyini bildirən Ş.Mustafayev indiyadək ölkə iqtisadiyyatına 80 mlrd. dollar vəsaitin yatırıldığını, bunun da yarısından çoxu xarici sərmayələr olduğunu bildirib: «İndiyədək ölkədə 900 min yeni iş yeri açılıb. Ümumiyyətlə, Cənubi Qafqaz regionu iqtisadiyyatında Azərbaycan iqtisadiyyatının ümumi payı 75% təşkil edir».

Tədbirdə çıxış edən Azərbaycanın sənaye və energetika naziri Natiq əliyev qeyd edib ki, Azərbaycan müstəqliik əldə etdiyi illərin əvvəlində ölkədə neft hasilatı ildə 6-7%, qaz hasilatı isə 9-10% aşağı düşürdü: «Əgər həmin illər ərzində Azərbaycan ildə 9 mln. ton neft və 6 mlrd. kubmetr qaz hasil edirdisə, artıq 2009-cu ildə bu rəqəmlər müvafiq olaraq 50,4 mln. ton və 23,6 mlrd. kubmetrə çatıb».

N.Əliyev Azərbaycanın neft-qaz tarixindən danışarkən qeyd edib ki, ümumiyyətlə Azərbaycan dünyaya son 60 il ərzində 1,6 mlrd. tondan artıq neft verib.

N.Əliyev onu da bildirib ki, əgər bundan öncə Azərbaycanın dövlət büdcəsinin 85-90%-i neftdən asılı idisə hazırda büdcənin yalnız 50%-i neft və qazın hesabına formalaşır və bu asılılıq getdikcə azalır.

Tədbirdə çıxış edən Azərbaycan Dövlət Neft Şirkətinin (ARDNŞ) vitse-prezidenti Xoşbəxt Yusifzadə ölkənin neft-qaz tarixindən ətraflı məlumat verərək qeyd edib ki, Azərbaycanda ilk neft 1847-ci ildə hasil edilib, 1901-ci ildə isə hasilatın həcmi 11 mln. ton təşkil edib və bu da ümumi dünya neft hasilatının 50%-ni təşkil edib: «Azərbaycanda illik neft hasilatının ən aşağı həcmi 2,4 mln. ton olub, 1941-ci ildə isə illik hasilat 23,5 mln. ton təşkil edib ki, bu da SSRİ-də istehsal olunan neftin 75%-ni təşkil edib».

ARDNŞ rəsmisi onu da bildirib ki, əgər «Azəri-Çıraq-Günəşli» yataqlar bloku Azərbaycanı neft ölkəsi kimi tanıdmışdırsa, «Şahdəniz» layihəsinin icrasından sonra Azərbaycan özünün qazla zəngin olduğunu da dünyaya göstərib: «Hazırda Azərbaycan Türkiyə, Rusiya, Gürcstan kimi ölkələrə qaz ixrac edir, gələcəkdə isə Yunanıstan və İtaliya kimi ölkələr də Azərbaycan qazını alacaq».