Maliyyə

Ana səhifə

Maliyyə

Azərbaycanda I Milli Sığorta Olimpiadası keçirilir

18 sentyabr 2010 10:13 (UTC +04:00)

Bakı. Elnur Hüseynquluyev – APA-Economics. Bu gün Bakıda Azərbaycan Sığortaçılar Assosiasiyası (ASA) və Maliyyə Nazirliyi Dövlət Sığorta Nəzarəti Xidmətinin təşkilatçılığı ilə I Milli Sığorta Olimpiadası başlayıb.

«APA-Economics»in məlumatına görə, olimpiadada ölkədə fəaliyyət göstərən 10 sığorta şirkətindən 30 nümayəndə iştirak edir. Nəticələri bu günün sonunda açıqlanacaq olimpiadada Moskvanın AFK Universitetinin təlim üzrə direktoru Qalina Sartan «Sığorta şirkətlərində agentlərdən ibarət komandanın yaradılması» mövzusu üzrə 3 saatlıq treninq (master-klass) keçəcək.

Tədbirin açılış mərasimində iştirak edən ASA-nın icraçı direktoru Qafar Məcidov dar profilli mütəxəssislərdə sığorta biznesi barədə ətraflı təsəvvürün yaranmasında olimpiadanın xüsusi rolunu və töhfəsini vurğulayıb. «Olimpiadada iştirak edənlərin hamısı gənclərdir. Olimpiada ilk növbədə gənc sığortaçılara mütəşəkkil bazarın birliyini isbat edir. Bununla biz Azərbaycanın iqtisadi məkanında yeni ənənələrin təməlini qoyuruq. Son 10 il ərzində Azərbaycan iqtisadiyyatının maliyyə sektoru, o cümlədən sığorta fəaliyyəti sahəsi durmadan inkişaf edir. Məhz bu olimpiadanın təşkil olunmasının əsas səbəbi kimi də gənclərin gələcəkdə sığorta sektorunda bu inkişaf tendensiyasını davam etdirməkdir», - deyə Q.Məcidov bildirib.

Dövlət Sığorta Nəzarəti Xidmətinin rəisi Namiq Xəlilov isə olimpiadanın ənənəvi hal alacağına və hər il təşkil olunacağına ümid etdiyini bildirib.

Tədbirdə həmçinin «AzRe» təkrarsığorta şirkəti İdarə Heyətinin sədr müavini Vüsal Abbasov da çıxış edib. Onun dediyinə görə, son 4-5 ildə Azərbaycanın sığorta bazarı yüksələn xətlə inkişaf edir: «Əsas nailiyyətlərindən biri «Sığorta fəaliyyəti haqqında» qanunun qəbul edilməsidir. Bu qanunun müvafiq maddəsində bütün sığorta şirkətlərinin rəhbər işçilərinin attestasiyadan keçməsinin icbariliyi vurğulanıb. Bu isə Azərbaycanın sığorta sektorunun inkişafı üçün daha təcrübəli və peşəkar kadrların cəlb olunmasına xidmət edir. Bundan başqa, sığorta sektoru böyüdükcə sığorta riskləri də artır. Bunun üçün sığorta şirkətləri tərəfindən mürəkkəb təkrarsığorta proqramları işlənib hazırlanmalıdır. Ümid edirəm ki, bu cür olimpiadaların nəticəsi olaraq gələcəkdə bu cür proqramların hazırlanmasında hər bir iştirakçının öz töhfəsi olacaq».

Qeyd edək ki, olimpiadanın baş sponsoru «AzRe» təkrarsığorta şirkətidir.