Maliyyə

Ana səhifə

Maliyyə

Azərbaycan parlamentinin payız sessiyasında «İnvestisiya fondları haqqında» qanun layihəsinin müzakirəsi davam etdiriləcək

21 sentyabr 2010 11:35 (UTC +04:00)

Bakı. Nicat Mustafayev – APA-Economics. Azərbaycan Qiymətli Kağızlar üzrə Dövlət Komitəsi (QKDK) tərəfindən hazırlanmış «İnvestisiya fondları haqqında» qanun layihəsi bu il parlamentin payız sessiyasında ikinci oxunuşda müzakirəyə çıxarılacaq. Bu barədə «APA-Economics»ə QKDK-nın sədri Rüfət Aslanlı məlumat verib.

R.Aslanlının sözlərinə görə, hazırda qanun layihəsi ilə bağlı Komitə parlamentlə intensiv müzakirələr aparır: «Bildiyimiz kimi, Milli Məclisin yaz sessiyasında qanun layihəsinin birinci oxunuşu keçirilib. Hazırda ikinci oxunuş ərəfəsində parlament komitəsində müzakirəyə çıxarılmasına hazırlaşırıq. Ümid edirəm Ki, qanun layihəsi Milli Məclisin payız sessiyasının ilk iclasdarında ikinci oxunuşa çıxarılacaq».

Qeyd edək ki, «İnvestisiya fondları haqqında» qanun investisiya fondlarının fəaliyyəti üçün tələb olunan əsas hüquqi sənəddir. Qanun layihəsinə investisiya fondlarının iki növü - səhmdar və paylı investisiya fondlarının fəaliyyəti haqqında müddəalar daxildir. Hazırda inkişaf edən ölkələrin bazarlarında əsasən paylı investisiya fondları (PİF) geniş yayılıb.

PİF-lərin fəaliyyəti fərdi investorlara payların satışından əldə olunan maliyyə vəsaitlərinin müxtəlif maliyyə və digər aktivlərin alınmasına yönəldilməsindən ibarətdir. Bu halda investor öz qazancını ona məxsus olan payın PİF-ə geri satışından (qaytarılmasından) əldə edir.

Onu da vurğulamaq vacibdir ki, Azərbaycanda investisiya fondları tərəfindən sərmayə qoyula biləcək istiqamət və alətlərin geniş olması nəzərdə tutulur. Yəni, bu yalnız qiymətli kağızlar deyil, digər aktivlər də ola bilər. Qanun layihəsində investorların hüquqlarının müdafiəsinə də xüsusi diqqət yetirilir.

Ekspertlər hesab edirlər ki, PİF-lərə yatırılan investisiyalar bank depozitlərinin alternativi olduğuna görə, bu fondlara qoyulan sərmayələr hətta bank depozitlərinin həcminə çatacaq. Çünki PİF-lərin payları üzrə illik gəlirlik 60-80% və hətta bundan da artıq ola bilər.