Maliyyə

Ana səhifə

Maliyyə

«Bank Standard» kredit məhsullarının siyahısını genişləndirib

23 sentyabr 2010 09:25 (UTC +04:00)

Bakı. Elnur Hüseynquluyev – APA-Economics. Azərbaycanın «Bank Standard» QSC istehlak kreditləri proqramının inkişafı çərçivəsində müştərilərə daha iki yeni kredit məhsulunu təqdim edib.

Bankın baş ofisindən «APA-Economics»ə verilən məlumata görə, biri daşınmaz əmlakın girovu, digəri isə müəssisənin zaminliyi qarşılığında verilən bu iki yeni kredit məhsulu asanlıqla əldə olunması və sadə rəsmiləşdirmə mexanizmi sayəsində qısa zaman ərzində müştərilərin böyük rəğbətini qazana bilər.

Daşınmaz əmlakın girovu qarşılığında verilən istehlak kreditinin fərqli xüsusiyyətləri arasında ilk növbədə kreditin alınma məqsədinə qoyulan məhdudiyyətlərin minimuma endirilməsini göstərmək olar. Bu kredit, istənilən istehlak məqsədi, o cümlədən, mal və ya xidmətlərin ödənilməsi, səyahət xərcləri və s. üçün sərf oluna bilər. Yeganə istisna olan avtomobil alqısı isə daha çox simvolik xarakter daşıyır («Bank Standard» öz müştərilərinə həmin məqsəd üçün daha əlverişli şərtləri olan xüsusi avtokredit təklif edir).

Daşınmaz əmlakın girov qoyulması yolu ilə verilən kredit üçün borcalanın istər şəhərdəki daşınmaz əmlakı, istərsə də şəhər kənarındakı evi girov qoyula bilər. Maksimal məbləği 30 min manat təşkil edən bu kredit 24 ay müddətinə və illik 22% dərəcəsi ilə verilir. Bu krediti almaq üçün borcalanın gəlirlərini təsdiq edən sənəd və ya üçüncü şəxs tərəfindən zaminlik tələb olunmur. Kredit borcalanın girov qoyulan əmlaka sahiblik hüququnu təsdiq edən sənəd və həmin girovun dəyərini təsdiq edən sənəd əsasında rəsmiləşdirilir.

Müəssisə və təşkilatların əməkdaşları üçün nəzərdə tutulan kreditə gəlincə isə, kredit bankın korporativ müştərilərinin işçilərinə müəssisənin rəhbərliyi ilə əldə olunan razılığa əsasən verilə bilər. Bu kreditin şərtlərinə əsasən, borcalanın zamini kimi onun işlədiyi müəssisə çıxış edir. Müəssisənin zaminliyi ilə verilən kreditin maksimal məbləği 5 min manat, müddəti 24 ay, faiz dərəcəsi isə illik 20% təşkil edir.

Kredit borcalanın gəlirləri haqqında təsdiq olunmuş arayış, işlədiyi müəssisə tərəfindən verilən zəmanət məktubu və tələb olunan digər sənədlər əsasında rəsmiləşdirilir.

Qeyd olunan hər iki kredit məhsulu yetkinlik yaşına çatmış və 6 aydan az olmayan iş stajına malik Azərbaycan vətəndaşları üçün nəzərdə tutulub.

Qeyd edək ki, bu yaxınlarda «Bank Standard» kredit verməkdən imtinaya əsas ola biləcək səbəblərin siyahısını açıqlayıb. Bu siyahıya sifarişçinin yaşının hər bir kredit məhsulu üçün ayrı-ayrılıqda müəyyən olunmuş yaş hədlərinə uyğun gəlməməsi, sifarişçinin gəlirlərinin krediti ödəmək üçün yetərli olmaması, həmçinin, kredit üçün müraciət edən şəxsin kredit tarixçəsinin mənfi olması daxildir.

«AB Standard» Şirkətlər Qrupuna daxil olan «Bank Standard» 1995-ci ildən fəaliyyət göstərir. Hazırda bankın respublika üzrə 17 filialı mövcuddur.