Maliyyə

Ana səhifə

Maliyyə

Azərbaycanın pərakəndə ticarət sektorunda mal ehtiyatları indeksi azalıb

24 sentyabr 2010 12:42 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən pərakəndə ticarət obyektlərində olan mal ehtiyatları indeksi 2010-cu ilin avqust ayı üzrə 103,2% təşkil edib. «APA-Economics»in Dövlət Statistika Komitəsinin məlumatları əsasında apardığı hesablamalara görə, iyul ayı üzrə bu göstərici 107,3%, iyunda isə 98,8%-ə bərabər olub. Məlumat üçün qeyd edək ki, mayda pərakəndə ticarət müəssisələrindəki mal ehtiyatları indeksi 100,8%, apreldə isə 105% təşkil edib.

İndeks hesabat ayının sonuna pərakəndə ticarət təşkilatlarında mal ehtiyatlarının dəyərinin əvvəlki ayın sonuna olan analoji göstəriciyə nisbəti kimi hesablanır. Bu indeksin azalması mal ehtiyatlarının aylıq artım göstəricilərinin müqayisəsini göstərir ki, onun 100%-dən aşağı və ya yüksək olması daha vacib göstəricidir. İndeksin 100%-dən yüksək olması ilk növbədə pərakəndə ticarətdə azalmanı göstərir. Eyni zamanda, həmin amil istehsal və idxal sektorlarından ticarət şəbəkəsinə mal göndərişinin artmasını əks etdirə bilər. Bunu dəqiq araşdırmaq mümkün olmadığı üçün, indeksin təhlili zamanı pərakəndə ticarətdə dinamikaya da diqqət yetirilməlidir. Belə ki, pərakəndə ticarət dövriyyəsi (dəyər ifadəsində) avqustda iyul ayı ilə müqayisədə 14,8 mln. manat və ya 1,4% artıb. Eyni zamanda, mal ehtiyatlarının dəyəri avqustda 4,1 mln. manat artıb ki, beləliklə istehsalçılar və idxalçılar tərəfindən pərakəndə ticarət şəbəkəsinə mal göndərişinin artırılması təsdiqini tapır.

Qeyd edək, pərakəndə ticarət təşkilatlarında mal ehtiyatlarının həcmi yanvarın 1-nə 125,6 mln. manat, fevralın 1-nə 110,9 mln. manat, martın 1-nə 113,4 mln. manat, aprelin 1-nə 119,1 mln. manat, mayın 1-nə 120,1 mln. manat, iyunun 1-nə 121 mln. manat, iyulun 1-nə 119,5 mln. manat, avqustun 1-nə 128,2 mln. manat, sentyabrın 1-nə isə 132,3 mln. manata bərabər olub.