Maliyyə

Ana səhifə

Maliyyə

«Bank of Baku» yeni «Telefon Bankçılıq - 145» xidmətini təqdim edib

27 sentyabr 2010 07:22 (UTC +04:00)

Bakı. Elnur Hüseynquluyev - APA-Economics. Azərbaycanın «MilliKart» Prosessinq Mərkəzi tərəfindən xidmət olunan «Bank of Baku» ASC yeni «Telefon Bankçılıq - 145» xidmətini təqdim edib.

«MilliKart»dan «APA-Economics»ə verilən məlumata görə, bu xidmət vasitəsilə müştərilər banka gəlmədən ölkənin istənilən yerindən istənilən vaxt kredit ödənişlərini istənilən telefonla həyata keçirə və hesabları barədə məlumat ala bilərlər. Bunun üçün sadəcə istənilən telefon (mobil və ya şəhər), «Bank of Baku»nun təqdim etdiyi müştəri kodu (müştəri kodu kreditin ödənişi zamanı bankın eksperti tərəfindən müştəriyə verilir) və plastik kart sahibi olmaq kifayətdir.

Sistemə daxil olmaq üçün 145 nömrəsini yığıb dil seçimini etmək, müştəriyə bank tərəfindən verilən müştəri kodunu sistemə daxil etmək və sistem tərəfindən təqdim edilən siyahıdan kredit növünü seçmək lazımdır. Sistemə daxil olarkən plastik kart məlumatlarının təqdimatından asılı olmayaraq müştərilərə əsas borc, faiz borcu, hesablanmış cərimə və bu günə ödənilməli borc barədə məlumatlar verilir.

Kod yanlış göstərildikdə, həmin telefon nömrəsindən sistemə daxil olma 15 dəqiqəlik bloklaşdırılır.

Qeyd edək ki, 18 bank tərəfindən təsis edilən «MilliKart» MMC 2006-cı ilin oktyabrından fəaliyyət göstərir. Cari ilin dekabr ayının 1-nə şirkətin nizamnamə kapitalı 4 mln. manat təşkil edir. Hazırda «MilliKart» MMC tərəfindən 13 banka xidmət göstərilir. Bu banklar tərəfindən 80 000-dən çox ödəniş kartları emissiya edilib, 200-dən çox bankomat və 2200-dən artıq POS-terminal quraşdırılıb.