Maliyyə

Ana səhifə

Maliyyə

İstanbul Maliyyə Sammiti işə başlayıb

28 sentyabr 2010 15:53 (UTC +04:00)

«APA-ECONOMICS»in məlumatına görə, sentyabrın 30-dək davam edəcək sammit Şimali Amerika, Avropa, Şərqi Asiya, körfəz ölkələrində fəaliyyət göstərən tanınmış maliyyə təşkilatlarının rəhbərlərini bir araya gətirib. Sammit çərçivəsində 18 ölkədən məruzəçilərin 50-dən çox məruzə dinləniləcək.

Sammitdə çıxış edən İFS-2010-nun sədri Murat Yulek vurğulayıb ki, qlobal maliyyə böhranından bir neçə nəticə hasil olub: “İlk növbədə aydın olub ki, dövlətlərin maliyyə sistemlərin inteqrasiyası, xüsusən də mikro səviyyədən iqtisadi əlaqələrin yaradılması və genişləndirilməsi vacibdir. Bundan başqa, dövlətlər tərəfindən makroiqtisadi, pul-kredit və antiinflyasiya siyasətlərin unifikasiyasının zəruriliyi də ortaya çıxıb. Hazırda çoxlu ölkələr artıq antiinflyasiya siyasətindən kənarlaşaraq maliyyə sistemlərinin dəstələnməsi siyasətini yeridir”.

Bahçeşehir Universitetinin rektoru Yelmaz Esmer çıxışında qeyd edib ki, böhran bir sıra siyasi proseslərə təkan verib, ümumilikdə dünyada siyasi gərginliyə təsir edib.

İstanbul Ticarət Palatasının başçısı Murat Yalçıntaş da öz çıxışında iqtisadi inteqrasiyanın vacibliyini, dövlətlərin bir-birini dəstəklənməsinin vacibliyini vurğulayıb.

İstanbul Bələdiyyəsinin başqanı Kadir Topbaş şəhərin iqtisadiyyatından danışarkən bildirib ki, şəhər və ölkənin rəhbərliyinin məqsədlərindən biri İstanbulu dünyanın maliyyə mərkəzlərinin birinə çevrilməsidir. Hazırda keçirilən sammiti də bu məqsədə doğru bir addım kimi qiymətləndirən K.Topbaş qeyd edib ki, İstanbulun iqtisadiyyatına cari ildə 22 mlrd. dollara yaxın sərmayə yatırılıb.

Türkiyənin dövlət naziri Cevdet Yılmaz öz çıxışında bildirib ki, dünya böhranı 2007-2008-ci illərdə ABŞ iqtisadiyyatından başlayıb, sonra dünyaya maliyyə böhranı kimi yayılıb, sonra isə yenidən iqtisadi böhrana çevrilib: “Böhranın ən mənfi nəticəsi odur ki, onun qabağını almaq mümkün olmayıb. Böhran “G-20” kimi birliklərin əhəmiyyətini kəskin artırıb. Çünki məhz belə formatlarla dünya iqtisadiyyatını idarə etmək mümkündür”.

Qeyd edək ki, «PGlobal» və «Yedi24» Şirkətlər Qrupu tərəfindən Almaniyanın «Financial Gates GmbH.» şirkətinin iştirakı ilə təşkil edilən və hər il təşkil edilməsi planlaşdırılan İstanbul Maliyyə Zirvəsi Bahçeşehir Universitetində reallaşıb.

Sammitdə dünya böhranından sonra maliyyə sektorunda vəziyyətin normallaşdırılması, ticarətin maliyyələşdirilməsi və ixracat kreditlərinin sığortalanması, islam maliyyəsi, islam bankçılığı və sərmayə bazarları, enerji və yerli layihələrin maliyyələşdirilməsi, özəl sərmayələr, sərmayə bazarları və alternativ maliyyə qaynaqları və s. mövzularda panel sessiyaların keçirilməsi nəzərdə tutulur.

Azərbaycanın APA İnformasiya Agentliyi «IFS-2010»un rəsmi media tərəfdaşı seçilib.