Maliyyə

Ana səhifə

Maliyyə

Azərbaycanda bankların mənfəəti 2,3 dəfə azalıb

30 sentyabr 2010 14:22 (UTC +04:00)

Bakı. Vahab Rzayev - APA-Economics. Azərbaycanda fəaliyyət göstərən kommersiya banklarının 2010-cu ilin yanvar-avqust ayları ərzində əldə etdiyi vergi ödənilənədək mənfəətin həcmi 89,65 mln. manat təşkil edib.

Azərbaycan Mərkəzi Bankından «APA-Economics»ə verilən məlumatına görə, 2009-cu ilin yanvar-avqust ayları ilə müqayisədə bu göstərici 117,09 mln. manat və ya 2,3 dəfə azalıb.

Yanvar-avqust aylarının yekunlarına görə, 121,89 mln. manat təşkil edən aktivlər üzrə xüsusi ehtiyatlara ayırmalar nəzərə alınmaqla, bankların cəmi mənfəətinin həcmi 211,54 mln. manata bərabər olub ki, bu da ötən ilin müvafiq göstəricisi ilə müqayisədə 68,87 mln. manat və ya 24,6% azdır. Bu natarazlığın səbəbi kimi ötən ilin 8 ayı ilə müqayisədə aktivlər üzrə xüsusi ehtiyatlara ayırmaların 1,7 dəfə artmasını qeyd etmək lazımdır.

Hesabat dövründə bankların faiz gəlirləri 684,39 mln. manat, faiz xərcləri 362,11 mln. manat və nəticədə xalis faiz mənfəəti 322,28 mln. manat təşkil edib. Eyni zamanda bankların qeyri-faiz gəlirləri 172,22 mln. manat, qeyri-faiz xərcləri isə 283,01 mln. manat təşkil edib ki, bunun da nəticəsində qeyri-faiz əməliyyatları üzrə 110,79 mln. manata bərabər olan zərər yaranıb. Beləliklə, faiz əməliyyatlarından əldə edilmiş mənfəətin 34,4%-i banklar tərəfindən qeyri-faiz xərclərin ödənilməsinə yönəldilib.

Ötən ilin 8 ayı ilə müqayisədə faiz mənfəəti 15,4% azalıb, qeyri-faiz zərəri isə 10,6% artıb. O cümlədən faiz gəlirlərinin cəmi 0,5% artdığı halda, faiz xərcləri 20,8% artıb. Qeyri-faiz əməliyyatlarında isə gəlir və xərcləri üzrə artım templəri müvafiq olaraq 1,9% və 5,% olub.

Qeyd edək ki, bu göstəricilərin yaranmasının iki əsas səbəbi var. İlk növbədə banklar öz qeyri-faiz əməliyyatlarından yalnız zərər əldə edir. Bundan başqa, kreditləşmədə müəyyən dərəcədə ehtiyatlı yanaşma və paralel olaraq depozitlərin fəal cəlb edilməsi nəticəsində bankların faiz gəlirləri üzrə artım tempi faiz xərclərin artım tempindən geri qalır.