Maliyyə

Ana səhifə

Maliyyə

Bakıda V Azərbaycan Mikromaliyyə konfransı keçirilir

05 oktyabr 2010 12:36 (UTC +04:00)

«APA-Economics»in məlumatına görə, iki gün davam edəcək konfransda mikromaliyyə və qanunvericilik, mobil bankçılıq və islam bankçılığı, sosial hesabatlılıq və sosial reytinq, kənd təsərrüfatı və mikrosığorta, dünya təcrübəsi və perspektivlər, maliyyə savadlılığı və müştərilərin hüquqlarının müdafiəsi, kredit bürolarının maliyyə bazarlarında rolu və mikromaliyyə sahəsinin maliyyələşdirilməsi mövzuları müzakirə olunacaq.

Tədbirin açılış mərasimində çıxış edən AMA-nın icraçı direktoru Jalə Hacıyeva bildirib ki, konfransın keçirilməsində əsas məqsəd maliyyə xidmətlərinin şəffaf və ədalətli şəkildə çatdırılmasını təşviq etmək, mikromaliyyə institutları, banklar, kredit ittifaqları və investorlar, donorlar və xidmət təminatçıları arasında əlaqənin yaradılması və məsuliyyətli mikromaliyyənin tətbiqi sahələri üzrə ən yaxşı təcrübə və yanaşmanı müzakirə etməkdir.

Konfransda Azərbaycan Mərkəzi Bankı (AMB) Kredit təşkilatlarının fəaliyyətinə nəzarət Departamentinin direktoru Rəşad Orucov AMB tərəfindən «Qeyri-bank kredit təşkilatları haqqında» qanuna aid altqaydaların hazırlandığını bildirib. Bu altqaydalarda qeyri-bank kredit təşkilatlarına xüsusi icazənin verilməsi, prudensial normativlər və digər aspektlər əksini tapıb. R.Orcovun sözlərinə görə, bu qaydalarda qeyri-bank kredit təşkilatları üçün banklara nisbətən daha yumşaq siyasət tətbiq olunub. Belə ki, qeyri-bank kredit təşkilatı sığorta agenti kimi çıxış edə bilər, həmçinin nümayəndəlik və filial açan zaman xüsusi icazə olmadan, sadəcə AMB-yə məlumatlandırıcı məktub göndərməklə işlərini davam etdirə bilər.

R.Orucov həmçinin qeyd edib ki, müştərilərin hüquqlarının müdafiəsi sahəsində AMB yaxın vaxtlarda Dünya Bankı ilə birgə «İstehlakçıların hüquqlarının qorunması» adlı yeni layihənin icrasına başlayacaq. Bu layihəyə ölkədə fəaliyyət göstərən qeyri-bank kredit təşkilatları cəlb olunacaq.

Qeyd edək ki, tədbirdə iştirak edən Milli Məclisin iqtisadi siyasət komitəsinin sədri Ziyad Səmədzadə və Azərbaycan Sahibkarlar Konfederasiyasının prezidenti Məmməd Musayev Azərbaycan iqtisadiyyatının inkişafı, o cümlədən mikromaliyyə sahəsində əldə olunan nailiyyətlərdən və bu sahədəki mövcud problemlərdən danışıblar.

Xatırladaq ki, «Azərbaycanda məsuliyyətli mirkomaliyyə» konfransında 20-yə yaxın xarici maliyyə təşkilatı, o cümlədən mikromaliyyə təşkilatlarında proqram təminatı üzrə texniki xidmət göstərən şirkətlər, həmçinin kredit-skorinq üzrə ixtisaslaşmış təşkilatların nümayəndələri iştirak edirlər.

AMA 2001-ci ildən fəaliyyət göstərir. Azərbaycandakı 18 mikromaliyyə təşkilatından 14-ü AMA-nın üzvüdür.