Maliyyə

Ana səhifə

Maliyyə

Son 15 ildə Azərbaycanın xarici ticarət dövriyyəsi 16 dəfə artıb

06 oktyabr 2010 11:50 (UTC +04:00)

Bakı. Nicat Mustafayev – APA-Economics. Son 15 il ərzində Azərbaycanın xarici ölkələrlə apardığı idxal-ixrac əməliyyatlarının ümumi həcmi 134 852,7 mln. ABŞ dolları təşkil edib ki, bunun 43 433,8 mln. dolları idxal, 91 418,9 mln. dolları isə ixracın payına düşüb.

Dövlət Statistika Komitəsindən «APA-Economics»ə verilən məlumata görə, əgər 1995-ci ildə xarici ticarət dövriyyəsinin həcmi 1 304,9 mln. dollar təşkil edibsə, 2009-cu ildə bu göstərici 16 dəfə artaraq 20 826,9 mln. dollara çatıb, o cümlədən idxal 9,2 dəfə artaraq 6,127 mlrd. dollara, ixrac isə 23,1 dəfə artaraq 14 699,9 mln. dollara çatıb. Azərbaycanın xarici ticarət dövriyyəsində 1995-ci ildə 30,5 mln. dollarlıq mənfi saldo yarandığı halda 2009-cu ildə 8 572,9 mln. dollar həcmində müsbət saldo əmələ gəlib.

Maraqlısı odur ki, Azərbaycanın xarici ticarət dövriyəsinin ən yüksək həcmi 2008-ci ildə qeydə alınıb - 54 925,5 mln. dollar – bu isə 2007-ci ilin göstəricisindən 4,7 dəfə çoxdur. Bu cür kəskin artıma dünya bazarında neftin qiymətinin sıçrayışla yüksəlməsi səbəb olub. Belə ki, 2008-ci ilin ortalarında neftin 1 barelinin qiyməti 140 dollardan artıq olub. Daha sonra isə dünya maliyyə böhranı səbəbindən neftin qiyməti kəskin azalıb ki, bu da Azərbaycanın xarici ticarət dövriyəsinə mənfi təsir göstərib. Belə ki, 2009-cu ildə ölkənin idxal-ixrac əməliyyatlarının həcmi 2008-ci illə müqayisədə 2,6 dəfə azalıb.

Qeyd edək ki, 2010-cu ilin yanvar-iyul ayları ərzində Azərbaycanın xarici ticarət dövriyyəsinin həcmi 15 516,2 mln. dollar, o cümlədən ixrac 12 008,5 mln. dollar, idxal isə 3 507,7 mln. dollar təşkil edib. Ticarət əlaqələrinin 77,4%-i ixracın, 22,6%-i idxalın hesabına formalaşıb və nəticədə 8 500,8 mln. dollarlıq müsbət saldo yaranıb. Ötən ilin yanvar-iyul ayları ilə müqayisədə xarici ticarət dövriyyəsinin həcmi 49,5%, o cümlədən ixrac 40,5%, idxal 8,3%, müsbət saldo isə 2,2 dəfə artıb.