Maliyyə

Ana səhifə

Maliyyə

İqtisadi Tədqiqatlar Mərkəzi: Sentyabrda Azərbaycanda inflyasiya 1,7% olub

08 oktyabr 2010 12:22 (UTC +04:00)

Bakı. Elnur Hüseynquluyev – APA-Economics. İqtisadi Tədqiqatlar Mərkəzi (İTM) «Alternativ inflyasiya səviyyəsinin hesablanması və modellərin işlənilməsi Layihəsi» çərçivəsində Azərbaycanın 22 regionunda 2010-cu ilin sentyabr ayı ərzində apardığı qiymətlərin statistik müşahidəsinin nəticələrini açıqlayıb.

Tədbirdə İTM-in İdarə Heyətinin sədr müavini Rasim Hüseynov bu ilin 9 ayında ən yüksək inflyasiyanın sentyabrda qeydə alındığını bildirib. Belə ki, aparılmış statistik müşahidələrin nəticəsi göstərib ki, ay ərzində Azərbaycanda istehlak qiymətləri 1,68% artıb. Bu zaman Bakıda qiymətlər 2,13%, regionlarda isə 1,25% artıb. Ümumilikdə isə, yanvar-sentyabr aylarında ölkədə 4,96% inflyasiya müşahidə olunub. Ötən ilin sentyabrına nisbətən ölkədə istehlak qiymətləri indeksi 7,55% artıb.

Sentyabrda ərzaq məhsulları üzrə ən yüksək bahalaşma yer pomidoru (32,19%), qarabaşaq yarması (24,68%), yer xiyarı (29,32%), bulka (5,91%), xidmətlər üzrə institutlarda (seminariyalarda) təhsil haqqı (10,40%), ən çox ucuzlaşma isə ərzaq məhsullarından nar (11,07%), qeyri-ərzaq məhsullarından kişi üçün cins şalvarlar (3,11%), minik avtomobilləri üçün ehtiyat hissələri və avadanlıqlar(9,34%), maykalar, futbolkalar (3-6 yaşlı uşaqlar üçün) (4,90%), xidmətlərdən isə hava sərnişindaşıma nəqliyyatı (4,17%) üzrə qeydə alınıb.

R.Hüseynovun sözlərinə görə, bahalaşma tendensiyası davamlı olacaq: «İnflyasiyanın səviyyəsindəki artımın iki mühüm səbəbini qeyd etmək olar. Birincisi, daxili bazarda idxal mallarının çəkisinin sürətlə artmasıdır. Hesablamalara görə, Azərbaycanın istehlak bazarı 50%-dən yuxarı idxal hesabına formalaşır. Qlobal iqlim dəyişiklikləri əksər regionlarda kənd təsərrüfatı məhsulları istehsalını aşağı salıb. Bu isə dünyada qiymətlərin bahalaşmasına səbəb olur. İnflyasiyanı şərtləndirən digər amil iqlim kataklizmlərinin daxildə kənd təsərrüfatı istehsalına mənfi təsiridir. Məhsuldarlığın və ümumilikdə istehsalın aşağı düşməsi ərzaq məhsullarının qiymətində ciddi artımlara gətirib çıxarır».

R.Hüseynov hesab edir ki, İTM-in illik inflyasiya səviyyəsi ilə bağlı verdiyi proqnoz özünü doğruldacaq: «İlin yekununda təxminən 8-9%-lik inflyasiya olacağını gözləyirik».

Bundan başqa, İTM ekspertləri sentyabr ayı üzrə minimum istehlak səbətinin dəyərini də hesablayıblar. Həmin hesablamalara əsasən, ötən ay Azərbaycanda yaşayış minimumu əmək qabiliyyətli əhali üçün adambaşına 141,07 manat, pensiyaçılar üçün 130,07 manat, 0-14 yaşlı uşaqlar üçünsə 160,04 manat təşkil edib. Sentyabr ayında əmək qabiliyyətli əhali adambaşına ərzağa minimum 80,52 manat, pensiyaçılar 76,03 manat, 0-14 yaşlı uşaqların valideynləri isə 92,84 manat xərcləməli olub. Ay ərzində bazardakı qiymətlərlə əhalinin qeyri-ərzaq məhsullarına çəkdiyi minimum xərcləri işləyən əhali üçün 34,89 manat, pensiyaçılar üçün 31,21 manat, 0-14 yaşlı uşaqlar üçün 49,74 manat, xidmət xərcləri isə müvafiq olaraq 25,66 manat, 22,83 manat və 17,46 manat təşkil edib.