Maliyyə

Ana səhifə

Maliyyə

«Qarant Sığorta» şirkətinin yığımları son bir ildə 77% artıb

11 oktyabr 2010 14:11 (UTC +04:00)

Bakı. Elnur Hüseynquluyev – APA-Economics. Azərbaycanın «Qarant Sığorta» şirkətinin 2010-cu il yanvar-sentyabr aylarında topladığı sığorta haqlarının həcmi 4,209 mln. manat təşkil edib ki, bu da 2009-cu ilin ilk 9 ayının nəticələri ilə müqayisədə 77% çoxdur. «APA-Economics»in məlumatına görə, bunu jurnalistlərlə keçirdiyi görüşdə «Qarant Sığorta» şirkəti İdarə Heyətinin sədri Vaqif Həsənov bildirib.

V.Həsənovun sözlərinə görə, ümumi sığorta yığımlarının 3,667 mln. manatı və ya 87%-i könüllü sığorta növlərinin payına düşüb. Məcmu daxilolmalarda 70% korporativ müştərilər, 30% isə fərdi müştərilər hesabına formalaşıb. Bundan başqa, bu müddət ərzində şirkət toplanan ümumi daxilolmaların 35%-ni yerli və xarici təkrarsığorta şirkətlərinə ötürüb. Şirkət öz risklərini ABŞ, Almaniya və digər xarici ölkələrdə fəaliyyət göstərən təkrarsığorta şirkətləri ilə bölüşüb.

V.Həsənov qeyd edib ki, hesabat dövründə sığorta riskləri üzrə ödənişlərin həcmi 5,5 dəfə artaraq 691 min manata çatıb: «Bu ayın sonuna qədər 1 mln. manatdan artıq sığorta ödənişi həyata keçiriləcək. Yəni, icraatda olan sığorta riskləri üzrə ödənişlərin həcmi 1 mln. manatdan çox olacaq».

Şirkətin 9 aylıq yekunları ilə bağlı məlumat verən V.Həsənov bu ilin yanvar-sentyabr aylarında dövlət büdcəsinə ödənilən vergilərin həcminin ötən ilin müvafiq dövrü ilə müqayisədə 50% artığını bildirib. Bununla yanaşı, Dövlət Sosial Müdafiə Fonduna ödənilən ödənişlərin həcmi son bir il ərzində 80% artaraq 207 min manata çatıb.

Tədbirdə daha sonra şirkətin 9 ay ərzində yaratdığı yeni sığorta məhsulları, eyni zamanda bir neçə mühüm layihələrdə sponsor kimi çıxış etməsi barədə geniş məlumat verilib.

Xatırladaq ki, təsisçisi «ZQAN Holding» Şirkətlər Qrupu olan «Qarant Sığorta» şirkəti 2007-ci ilin noyabr ayından fəaliyyət göstərir. Cari ilin oktyabr ayının 1-nə şirkətin nizamnamə kapitalı 4 mln. manat təşkil edib. Hazırda şirkət 18 könüllü və 4 icbari sığorta növü üzrə xidmət göstərir.