Maliyyə

Ana səhifə

Maliyyə

«Atəşgah» sığorta şirkəti ən yaxşı həvəskar reklam çarxı üzrə müsabiqə elan edib

13 oktyabr 2010 10:12 (UTC +04:00)

Bakı. Elnur Hüseynquluyev - APA-Economics. Azərbaycanın «Atəşgah» sığorta şirkəti reklama və videoçarxlara maraq göstərənlər üçün xüsusi müsabiqə keçirir.

Şirkətin baş ofisindən «APA-Economics»ə verilən məlumata görə, müsabiqədə iştirak etmək istəyənlərdən yalnız videoçarxı çəkmək, daha sonra isə onu www.youtube.com saytında yerləşdirib linkini “Atəşgah” şirkətinin elektron ünvanına ([email protected]) göndərmək tələb olunur.

Şirkətdən bildirib ki, videoçarxın müddəti 30 saniyədən artıq olmamalı, formatı mpg, 3gp, avi, 4mp, wmv, çəkisi 10 Mb-dan artıq olmamalıdır.

Video çarx «Atəşgah» sığorta şirkətinin pərakəndə məhsullarının birini - «Arxayın valideyn», «Arxayın sakin» və ya «Arxayın sürücü»nü reklam etməlidir. Çarxda mütləq «Arxayın yaşa» sloqanı və “Atəşgah” şirkətinin loqotipi (hər hansı bir daşıyıcıda - reklam lövhəsi, stiker və s.) olmalıdır. Həmçinin çarx mobil telefona, fotoaparata və ya veb-kameraya çəkilə bilər.

Qeyd edək ki, çarx peşəkar studiyada montaj edilməməli, kiminsə müəllif hüquqlarının pozulmaması ilə və rolikdə iştirak edən şəxslərin yazılı icazəsi ilə çəkilməlidir. Eyni zamanda çarxda qeyri-normativ leksika olmamalı, çarx reklam edilən məhsulla bağlı olmalıdır. Moderasiyadan sonra çarx «Atəşgah» sığorta şirkətinin “Facebook” sosial şəbəkəsindəki səhifəsində yerləşdiriləcək.

Müsabiqəçilər çarxlarını bu ilin noyabr ayının 15-dək göndərə bilərlər. Qalib gəlmiş çarx isə bu ilin noyabr ayının 20-dək müəyyən olunacaq.

Səsvermə Facebook səhifəsində on-line rejimində keçiriləcək. Hər həftə videoçarxlar arasında ən yaxşısı seçiləcək. Qalib gəlmiş reklam çarxı «Atəşgah» şirkətinin “Facebook” səhifəsində elan ediləcək. Reklam çarxı televiziyada yerləşdiriləcək və mətbuatda ətraflı şəkildə işıqlandırılacaq. Çarxın müəllifi ilin sonuna qədər Dubaya 5 günlük səyahət etmək imkanı qazanacaq.

Xatırladaq ki, “Atəşgah” sığorta şirkəti 1996-cı ilin dekabrında yaradılıb. «APA-Economics»in Maliyyə Nazirliyinin təqdim etdiyi rəqəmlər əsasında hazırladığı renkinqdə (bu ilin yanvar-avqust ayları) şirkət sığorta haqları (8,42 mln. manatla) və ödənişlər (3,37 mln. manat) üzrə 4-cü yerdə qərarlaşıb. Hazırda şirkətin Bakıda 5 ofisi, regionlarda isə 6 nümayəndəliyi fəaliyyət göstərir.