Maliyyə

Ana səhifə

Maliyyə

“Azərbaycan Respublikasının 2011-ci il dövlət büdcəsi haqqında” qanun layihəsinin Milli Məclisdə müzakirəsi başa çatıb

13 oktyabr 2010 12:04 (UTC +04:00)

APA-nın məlumatına görə, deputat Musa Quliyev gələn ilin dövlət büdcəsində sosial xərclərin 33% artırılmasını müsbət qarşıladıqlarını qeyd edib. Deputat ölkədə kardocərrahiyyə sahəsində vəziyyətin lazımi səviyyədə olmadığını, bu sahənin dövlət tərəfindən maliyyələşdirilməsinə ehtiyac duyulduğunu vurğulayıb.

Büdcə layihəsini müsbət qiymətləndirən deputat Aydın Mirzəzadə isə müəllimlərin və həkimlərin məvaciblərinin artırılmasına ehtiyac olduğunu deyib.

Deputat Yevda Abramov isə çıxışının bir hissəsini parlamentdə büdcə müzakirəsi zamanı layihəni tənqid edən müxalifətçi deputatlara həsr edib. O, büdcəni tənqid edənləri öz ətraflarına fikir verməyə çağırıb.

Deputat Şəmsəddin Hacıyev isə büdcənin hazırlanması zamanı istifadə olunan amilləri elmi cəhətdən əsaslandırmağa çalışıb. Büdcə layihəsini mükəmməl sənəd adlandıran deputat sənəd tərtib olunarkən elmi proqnozların əsas götürüldüyünü qeyd edib.

Millət vəkili Eldar İbrahimov isə kənd təsərrüfatına ayrılan vəsaitlərin artırılmasını təqdir etdiklərini deyib.

Müdafiə xərclərinin artımını müsbət dəyərləndirən deputat Qənirə Paşayeva sosial ipotekanın verilməsi üçün nəzərdə tutulan vəsaitin də artırılmasını təklif edib.

Deputat Arzu Səmədbəyli isə çıxışında deputat həmkarı Yevda Abramovun çıxışına münasibət bildirib. A. Səmədbəyli deputat həmkarını büdcə layihəsini oxumamaqda, heç bir müqayisə aparmadan çıxış etməkdə ittiham edib.

İclasda çıxış edən digər deputatlar isə öz dairələrindəki mövcud problemlərdən danışıb, yerlərdə problemlərin həlli istiqamətində görülməli olan işlərin dövlət büdcəsindən maliyyələşdirilməsini təklif ediblər.

Deputatların təkliflərini və suallarını cavablandıran maliyyə naziri Samir Şərifov bildirib ki, büdcə təsnifatı ilə bağlı suallar düzgün qaldırılıb: “Güman ki, yaxın vaxtlarda təsnifatlarda dəyişikliklər olacaq”. Nazir qeyd edib ki, sair xərclərdəki vəsaitin çox olması burada ehtiyat fondların cəmləşməsi ilə bağlıdır. Maliyyə naziri onu da vurğulayıb ki, deputatlar tərəfindən Quba rayonunda torpaq sürüşməsindən zərər çəkmiş kəndlərdə evlərin köçürülməsi məsələsi qaldırılıb və bu istiqamətdə işlər görülür.

Daha sonra iqtisadi inkişaf naziri Şahin Mustafayev deputatların suallarını cavablandırıb.

Bununla da 2010-cu ilin dövlət büdcəsinin layihəsi deputatların bəzi təklifləri nəzərə alınmaqla yenidən işlənib parlamentdə təsdiqə təqdim edilmək üçün təqdim olunub.

Layihə 10 gündən sonra yenidən baxılıb təsdiq edilməsi üçün parlamentə göndəriləcək.

Qeyd edək ki, 2011-ci il dövlət büdcəsinin layihəsində gəlirlər 12 061 mln. manat, xərclər 12 748 mln. manat, kəsir isə 687 mln. manat həcmində nəzərdə tutulub.