Maliyyə

Ana səhifə

Maliyyə

«Royal Bank»ın depozit portfeli son bir ildə iki dəfə artıb

20 oktyabr 2010 07:46 (UTC +04:00)

Bakı. Elnur Hüseynquluyev – APA-Economics. «Royal Bank» ASC-nin aktivlərinin həcmi 2010-cu il oktyabr ayının 1-nə 174,850 mln. manat təşkil edib ki, bu da ötən ilin oktyabrın 1-nə olan analoji göstərici ilə müqayisədə 29% çoxdur.

Bankın baş ofisindən «APA-Economics»ə verilən məlumata görə, hesabat dövründə bankın depozit portfeli 2,1 dəfə artaraq 115,444 mln. manata, o cümlədən əhalinin əmanətləri 49% artaraq 75,508 mln. manata çatıb. Bu müddət ərzində bankın kredit portfeli 23% artaraq 121,597 mln. manat, o cümlədən istehlak kreditlərinin həcmi 6,6% artaraq 91,433 mln. manat olub. Həmçinin, bankın məcmu kapitalı 11% azalaraq 19,393 mln. manat, o cümlədən nizamnamə kapitalı 4% artaraq 20,639 mln. manat təşkil edib.

Qeyd edək ki, son bir il ərzində bankın ümumi gəlirlərinin həcmi 16,3% artaraq 22,032 mln. manat, xərcləri isə 31% artaraq 23,522 mln. manata çatıb. Nəticədə, bu ilin yanvar-sentyabr aylarında bankın zərəri 1,490 mln. manat olub. Ötən ilin ilk 9 ayını isə bank 966 min manat mənfəətlə başa vurub.

Bu müddət ərzində bankın işçilərinin sayı 6% artaraq 614 nəfər, orta aylıq əmək haqqı isə 7,5% artaraq 548 manat olub. Eyni zamanda, bankın müştərilərinin sayı 21% artaraq 52 019-a, o cümlədən fiziki şəxslərin sayı 20% artaraq 49 994-ə, hüquqi şəxslərin sayı isə 22,3% artaraq 2 025-ə çatıb. Bankın aktiv plastik kartlarının sayı son bir ildə 3 dəfə artaraq 27 767, o cümlədən debet kartları 3,4 dəfə artaraq 25 333, kredit kartları isə 34% artaraq 2 434 ədəd olub.

Xatırladaq ki, təsisçisi ABŞ vətəndaşı olan «Royal Bank» ASC 1993-cü ildə Azərbaycanda «OZ Bank» kimi yaradılıb. Bankın ölkə üzrə 32 filialı, 31 bankomatı və 113 POS-terminalı fəaliyyət göstərir.