Maliyyə

Maliyyə

«Bank Standard» Bakıda avtokreditləşmə üzrə ixtisaslaşmış filial açıb

23 noyabr 2010 11:20 (UTC +04:00)

Bakı. Elnur Hüseynquluyev –APA-Economics. Azərbaycanın «Bank Standard» QSC Bakıda «Avtofinans» adlı avtokreditləşmə üzrə ixtisaslaşmış filialını açıb.

Bankın baş ofisindən «APA-Economics»ə verilən məlumata görə, bankın bu filialı Bakının Yeni Yasamal yaşayış massivi, Xarici dairəvi yol,4 ünvanındakı avtomobil bazarı ərazisində yerləşir. Bankdan bildirib ki, «Avtofinans» filialı bankın avtokreditləşmə proqramlarını həyata keçirən mərkəz kimi fəaliyyət göstərəcək. Filialda avtomobil kreditləri üzrə mütəxəssislərlə yanaşı, qiymətləndirmə və sığorta şirkətlərinin nümayəndələri də çalışır. Beləliklə, nəqliyyat vasitəsi üçün verilən kreditin rəsmiləşdirilməsi, habelə avtomobili sığortalama prosesi xeyli sadələşdiriləcək və daha az vaxt aparacaq.

Qeyd edək ki, filial tam bank xidməti göstərir və filialının iş vaxtı avtomobil bazarının iş rejiminə uyğunlaşdırılıb. Belə ki, filal bazar ertəsi - cümə, habelə şənbə günləri normal iş rejimində, saat 9:30-dan 17:00-dək, bazar günü isə saat 10:00-dan 14:00-dək müştərilərə xidmət göstərir. Filialın istirahət günü cümədir.

Xatırladaq ki, bu yaxınlarda «Bank Standard» avtokreditləşmə şərtlərini optimallaşdırıb. Proqramın əsas üstünlükləri onun aşağı faiz dərəcələri, kiçik məbləğdə ilkin ödəniş, habelə müştərinin rahatlığını təmin edən bir sıra digər şərtlərdir. Bunların arasında istifadə olunmuş nəqliyyat vasitələrini əldə etmək imkanı, tələb olunan sənəd paketinin minimal olması və rəsmiləşdirmənin sürətli şəkildə həyata keçirilməsi qeyd oluna bilər. Avtokreditləşmə proqramı, demək olar ki, ölkədə rəsmi təmsil olunan bütün avtomobil marka və modellərini əhatə edir.

«AB Standard» Şirkətlər Qrupuna daxil olan «Bank Standard» SKB 1995-ci ildən fəaliyyət göstərir. Bankın ölkə üzrə 17 filialı, 67 bankomatı və 428 POS-terminalı mövcuddur.