Maliyyə

Maliyyə

Bakıda BMT-nin SPECA Proqramı çərçivəsində Nazirlər Görüşü keçirilir

01 dekabr 2010 09:26 (UTC +04:00)

Bakı. Əli Əhmədov - APA-Economics. Bu gün Bakıda BMT-nin Mərkəzi Asiya İqtisadiyyatları üçün Xüsusi Proqramı - SPECA çərçivəsində Ticarət üçün Yardım Təşəbbüsünə dair Nazirlər Görüşü işinə başlayıb.

«APA-Economics»in məlumatına görə, görüşdə Azərbaycan, Qazaxıstan, Tacikistan, Qırğızıstan, Türkmənistan, Özbəkistan, Əfqanıstan, Finlandiya, eləcə də müxtəlif beynəlxalq təşkilatların nümayəndələri iştirak edir.

Tədbirin açılışında çıxış edən Azərbaycanın iqtisadi inkişaf nazirinin müavini Niyazi Səfərov bildirib ki, Ticarət üçün Yardım Təşəbbüsünün əsas məqsədi milli inkişafda ticarətin rolunu artırmaqdır. Bu təşəbbüs çərçivəsində iş 3 istiqamətdə aparılır. Bunlar ticarət siyasəti və tənzimləmə, ticarət infrastrukturunun inkişafı və istehsal gücünün artırılmasıdır. İkitərəfli və çoxtərəfli donorlar 2007-ci ildə bu məqsədlərə 25,4 mlrd. dollar yardım ediblər, 2010-cu ildə isə bu rəqəm 40 mlrd. dollara çatacaq.

N.Səfərov deyib ki, açıq dənizə çıxışı olmayan SPECA ölkələri milli iqtisadi inkişafda və həyat səviyyəsinin yüksəldilməsində regiondaxili ticarətin potensialından hələ də tam istifadə etmirlər.

Qeyd edək ki, «Ticarət və insan inkişafının ehtiyaclarının qiymətləndirilməsi» hesabatında bildirilir ki, SPECA ölkələri arasında ticarətin həddi arzu olunan səviyyədə deyil. Regionun ixracatının 60%-dən çoxu regiondan kənar ölkələrə gedir. Üstəlik, təşkilata daxil olan ölkələr dünyaya əsasən xammal və mineral resurslar ixrac edirlər. Bununla yanaşı, aparılan işlər nəticəsində 2009-cu ildə ixracatda bu məhsulların payı 79%-dən 71%-ə düşüb.

Qeyd edək ki, tədbirin ikinci günü keçiriləcək sessiyalarda bəzi regional layihələr də müzakirə olunacaq. N.Səfərov donor ölkələri və təşkilatları bu layihələrin reallaşması üçün SPECA ölkələrinə dəstəyi davam etdirməyə çağırıb.