Maliyyə

Maliyyə

Azərbaycan Mərkəzi Bankının rəhbəri zəif və problemli bankları konsolidasiyaya çağırıb

01 dekabr 2010 10:10 (UTC +04:00)

“APA-Economics”in xəbərinə görə, E.Rüstəmov AMB-nin “Debütbank” ASC və “Kövsərbank” ASC-də baş verən prosesləri bir müddət izlədiyini söyləyib.

Onun sözlərinə görə, adı çəkilən banklar öz likvidliyini və ödəmə qabiliyyətini itirib: “Ona görə də qanunvericiliyə uyğun olaraq bu banklara lisenziya verilməyib”.

Əhalinin lisenziyası ləğv edilmiş banklardakı əmanətlərinin taleyinə gəlincə, E.Rüstəmov qanunvericilik çərçivəsində tədbirlər görüləcəyini vurğulayıb: “Onsuz da o banklarda əhalinin əmanətləri çox minimal həcmdə olub”.

E.Rüstəmov qeyd edib ki, “Debütbank” ASC və “Kövsərbank” ASC-nin əhəmiyyətli dərəcədə kredit öhdəlikləri olduğu üçün onların qeyri-bank kredit təşkilatına çevrilməsi də mümkün olmayıb: “Dünya praktikası belədir ki, zəif və problemli banklar bu sistemdən uzaqlaşdırılır. Hələlik Azərbaycanda digər bankları bağlamağa ehtiyac yoxdur. Amma zəif və problemli bankları konsolidasiyaya çağırıram”.

Qeyd edək ki, Azərbaycan Mərkəzi Bankı İdarə Heyətinin qərarı ilə fəaliyyətdə olan iki bankın lisenziyası ləğv edilib. Minimum məcmu kapital tələbinə əməl etmədiyinə, bank qanunvericiliyinin tələblərini pozduğuna, o cümlədən idarəetməni və cari fəaliyyətini etibarlı və prudensial qaydada həyata keçirmədiyinə, habelə Mərkəzi Bankın ardıcıl və davamlı göstərişlərinə riayət etmədiyinə görə AMB-nin İdarə Heyətinin qərarı ilə «Debütbank» ASC və «Kövsərbank» ASC-yə bank əməliyyatlarının aparılması üçün verilmiş lisenziyalar ləğv edilib. Həmin qərarla «Debütbank» və «Kövsərbank» ASC-lərə müvəqqəti inzibatçılar təyin edilib.

Xatırladaq ki, «Kövsərbank» ASC 1989-cu ildə «Universal Bank» kimi yaradılıb. Cari ilin oktyabr ayının 1-nə bankın aktivlərinin həcmi 21,843 mln. manat, depozit portfeli 3,165 mln. manat, o cümlədən əhalinin əmanətləri 1,307 mln. manat, məcmu kapitalı 12,491 mln. manat, o cümlədən nizamnamə kapitalı 12,020 mln. manat təşkil edib. Bankın ölkə üzrə 2 filialı, 1 bankomatı və 25 işçisi olub. Bank şəriət prinsipləri əsasında fəaliyyət göstərdiyinə görə faizlə kreditlər təklif etməyib.

Təsisçisi bir neçə yerli fiziki şəxs olan «Debütbank» ASC isə 1994-cü ildən fəaliyyət göstərir. Hazırda bankın ölkə üzrə 7 filialı mövcud olub. Bank son illər ərzində maliyyə göstəricilərini açıqlamayıb.