Maliyyə

Maliyyə

Dünya Bankının Azərbaycanda həyata keçirdiyi pilot layihənin başa çatması münasibətilə təqdimat mərasimi keçirilib - FOTO

Dünya Bankının Azərbaycanda həyata keçirdiyi pilot layihənin başa çatması münasibətilə təqdimat mərasimi keçirilib - <font color=red>FOTO</font>

01 dekabr 2010 11:35 (UTC +04:00)

Bakı. Nicat Mustafayev - APA-Economics. Bu gün Bakıda “Maliyyə xidmətlərinin inkişafı” üzrə pilot layihənin başa çatması münasibətilə təqdimat mərasimi keçirilib.

“APA-Economics”in xəbərinə görə, tədbirdə çıxış edən Azərbaycanın rabitə və informasiya texnologiyaları naziri Əli Abbasov bildirib ki, hazırda ölkədə poçt və rabitə sahəsinə böyük diqqət yetirilir.

Onun sözlərinə görə, son 20 il bütün dünyada poçt və rabitə sahəsi üçün müəyyən problemlərlə yadda qalıb ki, bu da İKT sektorunun inkişafı ilə bağlıdır: “Bir çox İT şirkətləri poçt xidmətlərini öz üzərlərinə götürüblər”.

Ə.Abbasov qeyd edib ki, son 7 il ərzində Azərbaycanda poçt sahəsi 15-17% inkişaf edib, gəlirlər dəfələrlə artıb: “Lakin biz bununla kifayətlənməməliyik. “Maliyyə xidmətlərinin inkişafı” layihəsi çərçivəsində ölkənin poçt sistemi əsaslı surətdə dəyişib. Artıq 2011-ci ildən “Azərpoçt” mikrokreditlər verməyə başlayacaq. Gələcəkdə elektron ticarət, elektron səhiyyə, elektron təhsil və s. bu kimi digər xidmətlər də göstəriləcək”.

Azərbaycan Mərkəzi Bankı İdarə Heyətinin sədri Elman Rüstəmov layihənin müvəffəqiyyətlə başa çatdığını vurğulayıb: “Layihənin əsas məqsədi maliyyə sektorunun regionlarda inkişaf etdirilməsidir. Layihə çərçivəsində korporativ informasiya sisteminin yaradılması nəzərdə tutulur, hazırda bunun normativ-hüquqi bazası hazırlanır, tənzimləmə sistemi üzərində iş gedir”. E.Rüstəmov gələcəkdə “Azərpoçt”un depozitlər qəbul edəcəyini, depozitləri risksiz idarəetmə sisteminin, menecment və kadr potensialının yaradılacağını da söyləyib.

Ümumdünya Poçt İttifaqının baş direktoru Eduard Dayan bildirib ki, sözügedən layihə ölkə iqtisadiyyatının inkişafında mühüm rol oynayacaq, bir çox sahələrin inkişafına yardım göstərəcək: “Maliyyə böhranı dövründə İtaliya, Braziliya, İsveçrə kimi ölkələrdə insanlar banklardakı vəsaitlərini çıxarıb poçt şöbələrində saxlayıblar”.

Dünya Bankının Cənubi Qafqaz üzrə regional direktoru Əsəd Ələm layihəni müxtəlif sahələri birləşdirən körpü adlandırıb.

Rabitə üzrə Regional Rabitə Birliyinin baş direktoru Nuriddin Muhiddinov regionda poçt sahəsinin inkişafının yeni mərhələsinin başlandığını söyləyib: “Adətən oliqarxlar və varlı insanlar poçt sahəsindən istifadə etmirlər. Poçtdan kənd yerlərində yaşayanlar daha çox faydalanırlar”.

Azərbaycan baş nazirinin müavini Abid Şərifov qeyd edib ki, hazırda Azərbaycanda sosial infrastrukturun inkişafı müşahidə olunur: “Neftdən gələn gəlirlər bu sahənin inkişafına yönəldilir”. Onun sözlərinə görə, Dünya Bankı ilə Azərbaycan arasında əməkdaşlıq dövründə 51 layihə üzrə 2,844 mlrd. dollar həcmində kredit ayrılıb. O cümlədən 2,201 mlrd. dollarlıq 20 layihə hazırda davam edir, 642,5 mln. dollarlıq 31 layihə başa çatıb: “Hazırda Azərbaycanın İKT sektorunda rabitə peykinin orbitə çıxarılması, TAE (Trans-Asia-Europe layihəsi, regional innovasiya zonalarının yaradılması kimi layihələr həyata keçirilir”.

Qeyd edək ki, Azərbaycanla Dünya Bankı arasında 2005-ci ildə imzalanmış “İnkişaf krediti haqqında” sazişə uyğun olaraq “Azərpoçt” MMC-nin poçt şəbəkəsində “Maliyyə xidmətlərinin inkişafı” layihəsinin icrası başa çatıb. Ümumi dəyəri 17,75 mln. dollar olan layihənin 12,25 mln. dollarını Dünya Bankı, 5,5 mln. dollarını Azərbaycan hökuməti maliyyələşdirib. Layihə çərçivəsində 2010-cu ilin aprel ayında “Azərpoçt” bank xidmətləri göstərməyə başlayıb.